Leviticus 11:2-47
2«Израиль чонга мону чугаалаңар. Чер кырында бар, силерге чиирин чөпшээрээн дириг амытаннар бо-дур a. 3Кандыг-даа адыр дуюглуг, кегженир дириг амытанны чип болур силер. 4Адыр дуюглуг азы кегженир дириг амытаннардан чүгле дараазында дириг амытаннарны чип болбас силер: тевени, чүге дээрге ол кегженир-даа болза, адыр дуюу чок-тур, ынчангаш силерге арыг эвес боор-дур; 5сарлык-дегени ▼▼ Сарлык-деге – еврей дылда «шафан» дээр, хая-даштыг черге чурттаар үүрмек хээкчи (Ыд. ыр. 103:18; У. ч. 30:26 көр).
база, чүге дээрге ол кегженир-даа болза, адыр дуюу чок-тур, ынчангаш силерге арыг эвес боор-дур; 6койгунну база, чүге дээрге ол кегженир-даа болза, адыр дуюу чок-тур, ынчангаш силерге арыг эвес боор-дур; 7хаванны база, чүге дээрге ол адыр дуюглуг-даа болза, кегженмес-тир, ынчангаш силерге арыг эвес боор-дур. 8Ындыг янзылыг дириг амытаннарның эъдин чивеңер, сегинге дегбеңер! Олар силерге арыг эвес боор-дур. 9Сугга чурттаар бүгү дириг амытаннардан далайга азы хемге чоруур чакпалыг база казырыктыг амытаннарны чип болур силер. 10А бүгү-ле үүрмек суг амытаннарындан, сугга чоруур бүгү дириг амытаннардан далайга азы хемге чоруур чакпазы азы казырыы чок дириг амытаннарның шуптузу силерге бужар чүүл болур. 11Олар силерге бужар чүүл болзун: оларның эъдин чивеңер, сектеринден ческиниңер. 12Сугга чоруур чакпазы азы казырыы чок бүгү дириг амытаннар силерге бужар чүүл болур. 13А куштарның иштинден дараазында куштардан ▼▼ Куштар – куштарның аттарының чамдыызын шын очулдурган деп бүзүрелдиг чугаалаары берге, оларның элээн хөйү чүгле Чоокку Чөөн чүкте чурттап турар, ынчангаш бо даңзыны чижеглеп алган даңзы деп билзе чогуур.
ческиниңер (чип болбас, бужар амытаннар-дыр ол): эзирден, дастан, кара-дастан; 14дээлдигенден, бичежек эзирлерниң бүгү хевирлеринден; 15кускуннуң бүгү хевирлеринден; 16страустан, үгүден, ак-кускундан, хартыганың бүгү хевирлеринден; 17кызыл-үгүден, балыкчы-үгүден, тулаа кужу ибистен; 18ак-үгүден, пеликандан, тогдуктан; 19шиленден, аистиң бүгү хевирлеринден, итпиктен болгаш часкыдан. 20Дөрт-даяктап кылаштаар, ужар чалгынныг кандыг-даа курт-кымыскаяк силерге бужар чүүл болур. 21Ынчалза-даа дөрт-даяктап кылаштаар, ужар чалгынныг курт-кымыскаяк аразындан шураар буттарлыг курт-кымыскаякты чип болур силер. 22Оларның иштинден саранчаның, шартылааның, шергиниң янзы-бүрү хевирлерин ▼▼ Еврей сөзүглелде хээкчи курттарның дөрт аңгы хевириниң аттары кирген. Оларны тодарадып, чиге очулдурары кончуг берге.
чип болур силер e. 23Өске кандыг-даа чалгынныг, дөрт даван-даяктыг курт-кымыскаяк силерге бужар чүүл болур. 24Дараазында дириг амытаннар силерни арыг эвес кылып каар, оларның сегинге дегген кижи бүрүзү кежээге чедир арыг эвес болур. 25Оларның кайы-бирээзиниң сегин көдүрүп турган кижи бүрүзү хевин чуп аар ужурлуг база кежээге чедир арыг эвес болур f. 26Адыр эвес дуюглуг азы кегженмес мал бүрүзү силерге арыг эвес боор-дур. Ындыг малдың сегинге дегген кижи бүрүзү арыг эвес болур. 27Бүгү дөрт даванныг дириг амытаннарның аразындан дуюг чок даваннарлыг дириг амытан бүрүзү силерге арыг эвес боор-дур, оларның сегинге дегген кижи кежээге чедир арыг эвес болур. 28Оларның сегин көдүрүп турган кижи хевин чуп аар ужурлуг база кежээге чедир арыг эвес болур – шак ол дириг амытаннар силерге арыг эвес боор-дур. 29Чер кырында көжүп-шимчээн үүрмек дириг амытаннардан силерге арыг эвес амытаннар бо-дур: дедир-даван, күске, улуг селескениң янзы-бүрү хевирлери; 30гекко, хамелеон, летаа селеске, кох селеске болгаш тиншемет селеске ▼▼ Бо дириг амытаннарны ылаптыы-биле тодарадып, амгы үениң дириг амытаннары-биле дөмейлей көөрү болдунмас. Ынчангаш оларның чамдыктарының бурунгу еврей аттарын киирген.
. 31Бүгү-ле үүрмек дириг амытаннардан олар силерге арыг эвес боор-дур: оларның сегинге дегген кижи бүрүзү кежээге чедир арыг эвес болур. 32Оларның сегиниң кандыг-бир кезээ дээпкен бүгү чүве: кандыг-даа ыяш аптара, азы хеп, азы хөм-кеш, азы шоодай база ажыл-херек кылырда ажыглаар кандыг-даа херексел арыг эвес болур; оларны сугже суп каар херек h. Олар кежээге чедир арыг эвес болур, а ооң соонда арыг апаар. 33Оларның сегиниң кандыг-бир кезээ кире берген кандыг-даа дой сава иштинде турар бүгү чүве арыг эвес апаар, а саваны буза шаап каар ужурлуг силер i. 34Шак ындыг савага турган суг дегген кандыг-даа аъш-чем арыг эвес болур; ындыг савадан кудуп ижип турар кандыг-даа суксун база арыг эвес болур. 35Оларның сектериниң кандыг-бир кезээ кире берген бүгү чүве арыг эвес болур; янзы-бүрү дой суугулар ынчап барза, оларны чуура шаап кааптар херек, чүге дээрге силерге арыг эвес боор-дур. 36Чүгле суг бажы азы суглуг кудук арыг хевээр артар. А демги үүрмек дириг амытаннарның сегинге дээпкен кижи арыг эвес апаар. 37Оларның сегиниң кандыг-бир кезээ бир-ле тарыыр деп турар үрезинге дээптер болза, ол үрезин арыг хевээр артар. 38А бир эвес үрезинни суггарган соонда, оларның сегиниң кандыг-бир кезээ үрезинче кээп дүжер болза, ол силерге арыг эвес болур. 39Аъш-чемге ажыглап турарыңар кандыг-бир малыңар бодунуң өлүмү-биле өлүр болза, ооң сегинге дегген кижи кежээге чедир арыг эвес болур j. 40Ол сектиң эъдин ап чиир кижи хевин чуп аар ужурлуг база кежээге чедир арыг эвес болур. Оларның сегин көдүрүп турган кижи база хевин чуп аар ужурлуг; ол кежээге чедир арыг эвес болур. 41Чер кырында көжүп-шимчээн үүрмек дириг амытан бүрүзү силерге бужар чүүл-дүр, ону чип болбас. 42Хырнынга соястаар, дөрт-даяктап кылаштаар азы дөрттен хөй даванныг бүгү амытаннарны чивеңер – чер кырында көжүп-шимчээн үүрмек дириг амытан бүрүзү бужар чүүл болур. 43Бодуңарны ындыг дириг амытаннар-биле бужартатпаңар база оларга деггеш, арыг эвес апарбаңар. 44Чүге дээрге Мен – Дээрги-Чаяакчы Бурганыңар-дыр мен! Мен ыдыктыг болганымда, силер база ыдыктыг болу бериңер k. Бодуңарны чер кырында көжүп-шимчээн үүрмек дириг амытан-биле арыг эвес болдурбаңар. 45Мен – Бурганыңар болур дээш силерни египет черден үндүрүп эккелген Дээрги-Чаяакчы-дыр мен. Ыдыктыг бооп көрүңер, чүге дээрге Мен ыдыктыг-дыр мен. 46Мал-маган, куштар болгаш сугда азы чер кырында көжүп-шимчеп турар бүгү үүрмек дириг амытаннар дугайында дүрүм-хоойлу шак ындыг боор-дур. 47Ону силерге арыг, чип болур база арыг эвес, чип болбас дириг амытанны аңгылазын дээш берген l».
Copyright information for
TyvTUV