Lev 2 | TyvTUV | STEP | «Кандыг-бир кижи далган-тараазын Дээрги-Чаяакчыга өргүл кылдыр салып турар болза , ооң өргүлү эң шынарлыг кызыл-тас далганындан болзун; ол кижи далганынче олива үзүн кутсун база ладан дээр чаагай чыттыг чукту салзын.

‏ Leviticus 2

Далган-тараа өргүлү

1 «Кандыг-бир кижи далган-тараазын Дээрги-Чаяакчыга өргүл кылдыр салып турар болза ^a, ооң өргүлү эң шынарлыг кызыл-тас далганындан болзун; ол кижи далганынче олива үзүн кутсун база ладан дээр чаагай чыттыг чукту салзын. 2 Оон өргүлге салыр далган-тараазын Аароннуң оолдарынга – Бурганның бараалгакчыларынга аппарып берзин. Бурганның бараалгакчызы оортан бир адыш ишти далганны, олива үзүн болгаш ладанның шуптузун ап алзын – өргүлдүң сагындырыг болур кезээ ол-дур. Оон ону өргүл бедигээжинге өрттетсин: Дээрги-Чаяакчыга таарымчалыг чаагай чыт, отка өрттедир өргүл ол-дур ^b. 3 А далган-тараа өргүлүнүң арткан кезээ Аароннуу болгаш ооң оолдарыныы болур ^c: Дээрги-Чаяакчыга өргээн өргүлдер аразында аажок ыдыктыг өргүл ол-дур.

4 Суугуга хаарган далган-тараа өргүп турар болзуңза, ажыткы-биле хөөтпээн далгандан хаарган, олива үзү холаан боованы азы олива үзү-биле кырын чаап каан чуга хаарган далганнарны өргү ^d. 5 А бир эвес өргүлүңнү калбак тавак-пашка быжырган болзуңза ^e, олива үзү холаан, ажыткы-биле хөөтпээн далгандан быжырган далган-тараа болзун. 6 Ону үүрмектей буза тырткаш, олива үзүнден кудуп каг: далган-тараа өргүлү ол-дур. 7 А бир эвес өргүп турар далган-тарааңны борбак пашка быжырган болзуңза, олива үзү немеп каан далгандан быжырган өргүл болзун.

8 Ынчалдыр белеткеп быжырган өргүлүңнү Дээрги-Чаяакчыга эккелгеш, Бурганның бараалгакчызынга дамчыдып бер, а ол ону өргүл бедигээжинге салзын. 9 Оон ооң сагындырыг болур кезээн аңгылааш, өргүл бедигээжинге өрттетсин: Дээрги-Чаяакчыга таарымчалыг чаагай чыт, отка өрттедир өргүл ол-дур ^f. 10 А далган-тараа өргүлүнүң арткан кезээ Аароннуу болгаш ооң оолдарыныы болур: Дээрги-Чаяакчыга өргээн өргүлдер аразында аажок ыдыктыг өргүл ол-дур. 11 Дээрги-Чаяакчыга эккеп салып турарыңар кандыг-даа далган-тараа өргүлүн ажыткы-биле хөөтпээн болзун ^g, чүге дээрге Дээрги-Чаяакчыга өргүл кылдыр кандыг-даа ажыткыны база ары чигирин отка өрттетпес ужурлуг силер. 12 Оларны баштайгы дүжүттүң өргүлү кылдыр Дээрги-Чаяакчыга эккеп болур силер ^h, ынчалза-даа Дээрги-Чаяакчыга таарымчалыг чаагай чыттыг ыш болзун дээш өргүл бедигээжинге өрттетпеңер. 13 Далган-тарааңның кандыг-даа өргүлүн дузап ал, өргүлүңнү Бурганыңның чагыг-керээзин шынзыдып турар дус-биле дузаарын утпа: өргүлдериңниң шуптузун дузап каан болзун ⁱ.

14 А бир эвес Дээрги-Чаяакчыга чаа дүжүттүң баштайгы тараазындан далган-тараа өргүлү кылып турар болзуңза, баштай бышкан тараа баштарын отка хооргаш база үүредир соктааш, өргүлүң кылдыр эккел ^j. 15 Тарааңче олива үзү куткаш, ладанны база салып каг: далган-тараа өргүлү ол-дур. 16 Бурганның бараалгакчызы үүредир соктаан тарааны, олива үзүн болгаш бүгү ладанны ^k өрттетсин: Дээрги-Чаяакчыга салган отка өрттедир өргүл ол-дур ^l».