Lev 5:14-6:7 | TyvTUV | STEP | Дээрги-Чаяакчы Моисейге мынча деп чугаалаан:

‏ Leviticus 5:14-19

Кем-буруу дээш өргүл

14 Дээрги-Чаяакчы Моисейге мынча деп чугаалаан: 15 «Кандыг-бир кижи частырыг кылып бачыт үүлгеткеш ^a, Дээрги-Чаяакчыга бараалгадыр ужурлуг ыдыктыг чүүлдерин бараалгатпайн барган дижик. Ол кижи кем-буруузу дээш өргүл кылдыр шээр малындан четпес-дудуу эвес кошкарны Дээрги-Чаяакчыга эккеп салзын. Кошкарның өртээн ыдыктыг черге ажыглаар мөңгүн шекелге ^{▼▼ Ыдыктыг черге ажыглап турган шекел хүн бүрүнүң садыг-саарылгазынга ажыглап турганындан аар турган чадавас (Хост. 30:13 көр).} тодаратсын. 16 Ыдыктыг чүүлдерге чедирген когаралы дээш, демги кижи ооң өртээн төлээш, өртектиң бештиң бирин база немей бергеш ^c, Бурганның бараалгакчызынга хүлээдир ужурлуг. А Бурганның бараалгакчызы кем-буруу дээш өргүлдүң кошкарын өргээш, демги кижини арыглаарга, ол кижи Бурганның өршээлин алыр.

17 А бир эвес кандыг-бир кижи бачыт үүлгедип, Дээрги-Чаяакчының айтыышкыннарының бирээзинге удур кылып болбас чүве кылыр болза, боду-даа билбейн буруудай бергени ол-дур база буруузун ол боду чүктээр ужурлуг. 18 Ол кижи кем-буруузу дээш өргүл кылдыр бодунуң шээр малындан четпес-дудуу эвес кошкарны доктаадып каан өртектиң аайы-биле Бурганның бараалгакчызынга эккелзин. Бурганның бараалгакчызы демги кижини боду-даа билбейн кылган частырыындан арыглаарга, ол кижи Бурганның өршээлин алыр. 19 Демги кижиниң Дээрги-Чаяакчының мурнунга буруудаан кем-буруузу дээш салыр өргүлү ол-дур».

‏ Leviticus 6:1-7

1 Дээрги-Чаяакчы Моисейге мынча деп чугаалаан: 2 – 3 «Кандыг-бир кижи Дээрги-Чаяакчының мурнунга бачыт үүлгедип, кемниг херек кылып, өске кижиниң бүзүрелин шын эвес ажыглап, аңаа шыгжадып каан азы түр када ажыглаары-биле берип каан чүвезин „албадым“деп мегелээн, азы оорланган, азы өске кижиниң чүвезин хунаап алган, азы улустуң чидирген чүвезин тып алгаш ^d, меге даңгырак берип, чугаалаваан дижик ^e. Шак ындыг хевирлиг кемниг херектер кылыр болза, 4 ол кижи бачыт үүлгедип, буруудай берген-дир. Ындыг болганда, оорлап алган азы хунаап алган чүвезин база улустуң аңаа шыгжадып каан азы бодунуң тып алган чүвезин дедир эгидер ужурлуг. 5 Черле ынчаш мегелеп даңгырак бергени бүгү таварылгаларда ол кижи кем-буруузу дээш өргүл салып турары хүнде эт-хөреңгини ёзулуг ээзинге бүрүнү-биле дедир эгидип бээр база ооң өртээниң бештиң бирин немей төлээр ужурлуг ^f. 6 Оон ол кижи Дээрги-Чаяакчыга кем-буруузу дээш өргүл кылдыр шээр малындан доктаадып каан өртек ёзугаар четпес-дудуу эвес кошкарны Бурганның бараалгакчызынга эккеп берзин. 7 А Бурганның бараалгакчызы ону арыглаарга, демги кижи кылган бүгү-ле шак ол кем-буруулуг херектери дээш өршээлди алыр».