Leviticus 7:11-21
Эп-найырал өргүлүнүң дугайында тодаргайлаан дүрүм-хоойлу
11«Дээрги-Чаяакчыга улустуң эккеп салып турары эп-найырал өргүлүнүң дугайында дүрүм-хоойлу мындыг a. 12Бир эвес кандыг-бир кижи өөрүп четтиргенин илередип, ону эккеп салып турар болза, ол өргүлү-биле кады олива үзү холааш, ажыткы-биле хөөтпейн быжырган хлебти, олива үзү-биле кырын чагган чуга хаарган далганнарны база олива үзүн экидир холуп каан эң шынарлыг далгандан быжырган бооваларны эккеп салзын b. 13А оон ыңай өөрүп четтириишкин өргүлү-биле кады ажыткылыг хлебти база эккеп салыр ужурлуг. 14Ол кижи бодунуң эккеп турары бүгү өргүлүнден Дээрги-Чаяакчыга өргүл кылдыр салзын дээш, далган-тарааның аймак бүрүзүнден үзүп берзин: оларны эп-найырал өргүлүнүң ханын төпкен бараалгакчы алыр. 15Өөрүп четтириишкин өргүлүнүң эъдин ону өргүлге салган хүнде-ле чиир ужурлуг, даартагы эртенге чедир арттырып болбас c. 16А бир эвес кандыг-бир кижи малды бодунуң даңгыраан күүседир дээш азы эки туразы-биле эп-найырал өргүлү кылдыр эккеп салып турар болза, ооң эъдин ону өргээн хүнде-даа, даартазында-даа чип болур d. 17Ынчалза-даа өргүл эъди үшкү хүнде база артып каар болза, отка өрттедир ужурлуг. 18А бир эвес ол кижи эп-найырал өргүлүнүң эъдин үшкү хүнде чиир болза, Бурганга таарымчалыг болбас, ону өргүл кылган деп санавас; ол эът бужартаан болур, а ону чигген кижи буруузун боду чүктээр. 19Кандыг-бир арыг эвес чүүлге дегген өргүл эъдин база чип болбас – ону отка өрттедир ужурлуг. Арыг кижи бүрүзү эътти чип болур, 20а бир эвес кандыг-бир кижи, арыг эвес апарган тургаш, Дээрги-Чаяакчыга салган эп-найырал өргүлүнүң эъдин чиир болза, ол кижини бодунуң чонунуң аразынга амы-тынныг арттырбас e. 21Бир кижи кандыг-даа арыг эвес чүвеге: азы арыг эвес кижиге, азы арыг эвес малга, азы бир-ле арыг эвес үүрмек дириг амытанга дегген соонда, Дээрги-Чаяакчыга салган эп-найырал өргүлүнүң эъдин чиир болза, ол кижини бодунуң чонунуң аразынга амы-тынныг арттырбас».
Copyright information for
TyvTUV