Luk 4:31-41 | TyvTUV | STEP | Оон Иисус Галилеяның Капернаум хоорайынче бадып келгеш , амыр-дыш хүнүнде чонну өөредип эгелээн.

‏ Luke 4:31-41

Иисус Капернаумнуң синагогазында

(Мк. 1:21-28)

31 Оон Иисус Галилеяның Капернаум хоорайынче бадып келгеш ^a, амыр-дыш хүнүнде чонну өөредип эгелээн. 32 Ооң канчаар өөредип турарын шупту улус кайгап ханмаан, чүге дээрге Ооң сөзү эрге-чагыргалыг болган ^b.

33 Синагогага букшуураан бир кижи турган, ол ыыткыр алгыра берген: 34 «Эй! Назарет чурттуг Иисус, Силерге бистен чүү херегил? ^c Силер бисти узуткаар дээш келдиңер бе? Силерни кым дээрзин билир мен ^d, Силер – Бурганның Ыдыктыг Төлээлекчизи-дир силер!»

35 Иисус букка: «Ыыттава, ол кижиден үне бер!» – деп шыңгыы дужаарга, бук демги кижини улус мурнунга ойтур октааш, аңаа кандыг-даа хора чедирбейн, оон үнүп чоруй барган ^e.

36 Ону көрген улус кайгап-харап шаг болгаш, аразында мынча дижип турган: «Бо чүү мындыг чүвел? Буктарга безин дужаарга, олар үнгүлей бээр, ындыг чагырга база күш ол Кижиде бар деп аан?» 37 Ооң дугайында дамчыыр чугаа ол кезек черлерни бир кылдыр тарай берген.

Иисустуң аарыг кижилерни экирткени

(Мф. 8:14-17; Мк. 1:29-34)

38 Синагогадан үнгеш, Ол Симоннуң бажыңынче чорупкан; а Симоннуң кат-иези ^f халыын аарыгдан аарааш, аажок эъди изип чыдар боорга, аңаа дузалап көөрүн Иисустан дилээннер. 39 Ол чыткан херээженниң кырынче ээккеш, халыын аарыгны соксаарын дужаарга, оозу херээженни каапкаш барган. Херээжен дораан-на туруп келгеш, оларга бараан болуп кирипкен.

40 Хүн ажып турда, шупту улус боттарының янзы-бүрү аарыглардан аараан кижилерин Аңаа эккелгеш туруп берген. Ол кижи бүрүзүнге холу-биле деггеш, экиртип турган. 41 Хөй кижилерден буктар: «Силер – Бурганның Оглу-дур силер! ^g» – деп кышкырбышаан, үне халчып турганнар. Ынчалза-даа Ол Ону Христос деп билир дээрзин чугаалаарын оларга хоруп каан ^h.