Luke 7:18-35
Иоанн Медеглекчиниң дугайында
(Мф. 11:2-19)
18Иоанның өөреникчилери ол бүгүнүң дугайында аңаа чугаалап чеде бергеннер. 19Иоанн оларның ийизин кый деп алгаш, Дээрги Иисустан мынча деп айтырары-биле айбылапкан: «Чедип кээр ужурлуг Кижи Силер силер бе азы өскезин манаар бис бе?» a 20Олар Иисуска келгеш: «Бисти Иоанн Медеглекчи Силерден: „Чедип кээр ужурлуг Кижи Силер бе азы өскезин манаар бис бе?“– деп айтырары-биле чорудупту» – дээннер. 21Иисус ынчан хөй улусту аарыг-аржыындан, аза-бугундан экиртип, арыглап каан, хөй согур кижилерни каракталдырып каан турган. 22Ол айбычыларга мынча деп харыылаан: «Силер баргаш, көрген, дыңнаан чүвеңерни Иоаннга чугаалап чедиңер: согурлар каракталып, аскактарның буду бастынып, кеш аарыглыглар арыгланып, дүлейлерниң кулаа дыңнай берип, өлгеннер катап дирлип база ядыыларга Буянныг Медээни дыңнадып турар-дыр b деңер. 23Меңээ бүзүрелин чидирбес кижи амыр-чыргалдыг болур» c. 24Иоанның айбычылары чоруй баарга, Иисус чонга ооң дугайында чугаалап эгелээн: «Ээн кургаг ховуже чүнү көөр дээш барып чордуңар? d Хатка чайгаткан кулузунну бе? 25Ындыг эвес болза, чүнү көрүп чордуңар? Каас-коя хептиг кижини бе? Ынчалза-даа каас-коя хеп кедер база бай-шыырак чурттап чоруур улус хааннар ордуларынга турар болгай. 26Чүнү көөр бис деп бодадыңар? Бурганның медээчизин бе? e Ийе, медээчини. Харын-даа силерге чугаалап тур мен: ол – медээчиден-даа артык кижи-дир. 27Бижилгеде ол дугайында Бурганның: „Көр даан, Мээң төлээм Сээң мурнуңда орукту белеткеп берзин дээш, Сени мурнай ону чорудуп тур мен“ f – дээн кижизи ол-дур. 28Чер кырынга чурттап чораан бүгү улустуң аразында Иоанндан артык кижи чогун Мен силерге чугаалап тур мен g, ындыг-даа болза, Бурганның Чагыргазында эң чөгенчиг кижи оон улуг болур. 29Бүгү чон, оон туржук, үндүрүг хавырыкчылары безин Иоанның суртаалын дыңнааш, Бурганның бодалын шын деп хүлээп көргеш, аңаа барып, сугга суктуруп алганнар-дыр h. 30А фарисейлер болгаш ном-хоойлу тайылбырлакчылары Бурганның күзел-соруун хүлээп албайн, сугга суктурарындан ойталааннар-дыр. 31Ынчангаш бо салгалдың улузун Мен кымның-биле деңнээйн? Кандыг улузул ол? 32Олар кудумчуга олуруп алгаш, бот-боттарынга:„Бис силерге лимбилеп бердивис,а силер самнавадыңар;
бис силерге кажыыдал ыры ырлап бердивис,
а силер ыглашпадыңар“– деп алгырышкан бичии уруглар олчаан-дырлар.
33Иоанн Медеглекчи чедип келгеш, хлеб-даа чивес, арага-даа ишпес боорга i, силер ону: „Букшуураан-дыр“– деп баар-дыр силер. 34Кижи амытан Оглу чедип келгеш, чемненир, ижер боорга j, силер Ону: „Көрүңер даан, чазый, арагачы хей-дир, үндүрүг хавырыкчылары болгаш бачытка борашканнарның өңнүү-дүр“– деп баар-дыр силер k. 35А мерген угаан бүгү үре-түңнели-биле шынзыттынар».
Copyright information for
TyvTUV