Mar 1:21-28 | TyvTUV | STEP | Олар шупту Капернаум хоорайга чедип келген . Үр болбаанда, Иисус амыр-дыш хүнүнде синагогаже кирип келгеш, улусту өөреди берген.

‏ Mark 1:21-28

Иисустуң аарыг кижилерни экиртип эгелээни

(Лк. 4:31-41)

21 Олар шупту Капернаум хоорайга чедип келген ^a. Үр болбаанда, Иисус амыр-дыш хүнүнде синагогаже кирип келгеш, улусту өөреди берген. 22 Ооң берген өөредиин улус кайгап ханмаан, чүге дээрге Иисус оларны ном-хоойлу тайылбырлакчылары ышкаш эвес, а эрге-чагырга ээлээн кижи ышкаш өөредип турган ^b.

23 Ол синагогага букка алыскан бир кижи алгырып үнген: 24 «Назарет чурттуг Иисус, Силерге бистен чүү херегил? ^c Силер бисти узуткаар дээш келдиңер бе? Силерни кымыл дээрзин билир мен ^d, Силер – Бурганның Ыдыктыг Төлээлекчизи-дир силер!» ^e

25 Иисус букка: «Ыыттава, ол кижиден үне бер!» – деп шыңгыы дужааган. 26 Бук ынчан ол кижини курулдурупкаш, ыыткыр алгырбышаан, оон үне берген ^f.

27 Шупту улус кайгап-харааш, аразында: «Чүү деп чүвел бо? Ол Кижи буктарны безин чагырарга, олар Аңаа чагыртып турар, кандаай ындыг чаа, күштүг өөредиг чүвел бо? ^g» – деп турган. 28 Удатпаанда Ооң дугайында дамчыыр чугаа бүгү Галилеяга тарай берген.