Mark 1:40-45
Кежи аарыг кижини экирткени
(Мф. 8:1-4; Лк. 5:12-16)
40Бир-ле катап Иисуска кежи аарыг кижи чедип келгеш a, Ооң мурнунга дис кырынга олура дүшкеш, Аңаа: «Күзээр-ле болзуңарза b, Силер мени арыглап каар силер» – деп чалынган. 41Иисус ону кээргей бергеш, холун сунуп, кежи аарыг кижиге деггеш, аңаа мынча дээн: «Күзеп тур мен, арыгланы бер!» 42Кеш аарыы ол-ла дораан демги кижиден адырлы берген. Ооң кежи арыгланы берип, каң-кадык апарган c. 43Иисус оон ол кижини чорудуп тура, аңаа шыңгыы чагып каан d: 44«Дыңна, кымга-даа бо дугайында чугаалава. Баргаш, Бурганның бир-ле бараалгакчызынга көстүп каг, оон Моисейниң хоойлузунда айытканын ёзугаар, арыгланганың дээш, Бурганга өргүлден кыл e. Сен ол өргүлүң-биле экирээниңни улуска херечилеп көргүскен боор сен». 45А ол кижи чоруткаш, болган таварылганың дугайында шупту улуска чарлап, үзүк-соксаал чок чугаалап эгелээн f. Ынчангаш Иисус хоорайларже көзүлдүр кээр арга чок апаргаш, хоорай даштында ээнзиргей черлерге туруп алыр ужурга таварышкан. Улус Аңаа дөмей-ле чер болгандан кээп туруп берген.
Copyright information for
TyvTUV