Mar 10:35-45 | TyvTUV | STEP | Зеведейниң оолдары Иаков биле Иоанн Иисуска чедип келгеш, мынча дээннер: «Башкы! Бистиң дилээвисти күүседип бээриңерни күзеп тур бис».

‏ Mark 10:35-45

Иаков биле Иоанның дилээ

(Мф. 20:20-28)

35 Зеведейниң оолдары Иаков биле Иоанн ^a Иисуска чедип келгеш, мынча дээннер: «Башкы! Бистиң дилээвисти күүседип бээриңерни күзеп тур бис».

36 Иисус: «Силерге чүнү кылып бээримни күзеп тур силер?» – деп айтырган.

37 Олар: «Силер алдарлыг дүжүлгеге чагырып эгелээриңерге, Силерниң чаныңарга: бирээвис – оң талаңарга, өскевис – солагай талаңарга олурарывысты хайырлап көрүңер» – деп харыылааннар ^b.

38 Иисус оларга мынча дээн: «Чүнү дилеп турарыңарны билбес-тир силер. Мээң ам ижерим дашканы ижип шыдаар силер бе? ^c Мээң шыдажып эртерим дег, шак ындыг хилинчекке суктурарын силер ^d база шыдажып эртип шыдаар силер бе?»

39 Олар: «Шыдаар бис» – деп харыылааннар. Иисус ынчан оларга мынча дээн: «Мээң ам ижерим хилинчектиң дашказын силер база ижер силер, Мээң хилинчекке суктурарым дег, силер база хилинчекке суктурар силер ^e. 40 Ынчалза-даа Мээң оң азы солагай таламга олурарын хайырлаары Менден хамаарышпас. Аңаа Бурганның олурзун деп айтып кааны улус орар».

41 Өске он элчин ол чугаа дугайында дыңнап кааш, Иаков биле Иоаннга хорадай бергеннер. 42 Иисус ынчан оларны чыып алгаш, мынча дээн: «Өске чоннарның чагырыкчылары боттарының улузун дарлап турарын, а даргалары оларны бастып турарын билир болгай силер. 43 А силерниң араңарга ындыг чүве турбазын! ^f Силерниң араңардан алдар-хүндүлүг болуксаар кижи бар болза, чалчаңар болзун ^g. 44 Силерниң араңарга бир дугаар болуксаан кижи бар болза, шупту улустуң кулу болзун. 45 Кижи амытан Оглу база улус Аңаа бараан болзун дээш эвес, харын Боду оларга бараан боору-биле ^h база Бодунуң амы-тынының өртээ-биле хөй улусту хостап аар дээш келген болгай» ⁱ.