Mar 14:55-64 | TyvTUV | STEP | Бурганның дээди бараалгакчылары база бүгү дээди иудей Чөвүлел Иисусту өлүрүп шиидер чылдагаан бар болзун дээш, Аңаа удур буруудаткан херечилел тыварын оралдашса-даа, чүнү-даа тыппааннар.

‏ Mark 14:55-64

55 Бурганның дээди бараалгакчылары база бүгү дээди иудей Чөвүлел Иисусту өлүрүп шиидер чылдагаан бар болзун дээш, Аңаа удур буруудаткан херечилел тыварын оралдашса-даа, чүнү-даа тыппааннар. 56 Иисуска удур меге херечилел кылган улус хөй-даа болза ^a, оларның ол херечилелдери аразында дүүшпес болган ^b. 57 Ооң соонда элээн каш меге херечи туруп келгеш, Аңаа удур херечилел кылып, мынча дээннер: 58 «Бис Ооң: „Кижи холу-биле туткан Бурганның бо өргээзин үрегдеп-бускаш, үш хүн дургузунда өске, кижи холу-биле тутпаан ^c өргээден тудуп тургузуптар мен ^d“– деп турганын дыңнаан бис». 59 Ынчалза-даа оларның безин херечилелдери дүүшпес болган.

60 Бурганның дээди бараалгакчызы ынчан Иисустуң мурнунга туруп алгаш: «Чүге харыылавайн тур сен? Бо улустуң сеңээ удур чүнү херечилеп турары ол?» – деп айтырган ^e. 61 Ынчалза-даа Иисус ыыттаваан болгаш чүнү-даа харыылаваан ^f. Бурганның дээди бараалгакчызы Оон база катап айтырыг салган: «Сен ылап-ла Христос, йөрээлдиг Бурганның Оглу сен бе?» ^g

62 Иисус мынча деп харыылаан: «Ийе, Мен мен. Моон соңгаар силер шупту Кижи амытан Оглунуң Күчүлүг Бурганның оң талазында олурарын база дээрниң булуттарынга бүргеттирген кел чыдарын көөр силер» ^h.

63 Бурганның дээди бараалгакчызы ынчан кеткен хевин ора соп каапкаш ⁱ, мынча дээн: «Биске ам херечилерниң херээ чүл? 64 Силер Ооң Бурганны дорамчылаанын дыңнадыңар ^j. Кандыг шииткел үндүрер силер?» Олар шупту: «Ол буруулуг база өлүр ужурлуг» – деп чугаалааннар ^k.