Mar 7:1-23 | TyvTUV | STEP | Иерусалимден чедип келген фарисейлер болгаш элээн каш ном-хоойлу тайылбырлакчызы Иисустуң чанынга чыглып келгеннер.

‏ Mark 7:1-23

Бурганның хоойлулары азы ада-өгбениң дүрүмнери

(Мф. 15:1-20)

1 Иерусалимден чедип келген фарисейлер болгаш элээн каш ном-хоойлу тайылбырлакчызы Иисустуң чанынга чыглып келгеннер. 2 Олар Ооң чамдык өөреникчилериниң холдарын чугбайн, арыг эвес байдалда чемненип олурарын эскерип кааннар. 3 (Херектиң ужуру чүдел дээрге, бүгү иудейлер, а фарисейлер кымдан-даа артык, ада-өгбезиниң чаңчылдарын шыңгыы сагыыр ^a, тускай чурумчуткан аайы-биле холун чугбаан шаанда, чемненип олурбас улус чүве-дир. 4 Базаардан садыглашкаш келгеш, олар холун чугбаан шаанда ^{▼▼ Азы: «Олар садып эккелген хамык чүвезин чугбаан шаанда».}, чем чивес турган. Оларның сагыыр кылдыр хүлээп алган оон-даа өске дыка хөй сагылга-дүрүмнери бар ^c, чижээлээрге, аяктарны, дөмбүңнерни, чес сакпыңнарны, дөжектерни чурумчуткан аайы-биле чууру дээн ышкаш.) 5 Ынчангаш фарисейлер болгаш ном-хоойлу тайылбырлакчыларының Иисустан: «Чүге Силерниң өөреникчилериңер ада-өгбениң ёзу-чаңчылын тоовазыл? Чүге олар арыг эвес холдарын чугбайн, чем чиирил? ^d» – деп айтырганы ол.

6 Иисус мынча деп харыылаан: «Ийи арынныг ^e силерниң дугайыңарда Исайя медээчи Бурганның өмүнээзинден шын-на бижээн-дир:

„Бо чон Мени сөс кырында хүндүлээр,
а сеткил-чүрээ-биле Менден ырак.
7 Оларның Меңээ мөгейиишкини хей чүве-дир,
чүге дээрге оларның өөредии –
чүгле кижилер чогааткан сагылга-дүрүмнер-дир“ ^f.

8 Силер Бурганның айтыышкыннарын тоовайн каапкаш, улустуң чаңчылдарын эдерер-дир силер» ^{▼▼ Өске бурунгу сөзүглелдерде бо сөстерге «Аяк-сава чуурун сагып база өске-даа шак ындыг чүүлдерни хөйү-биле кылып турар-дыр силер» деп сөстерни немээн.}. 9 Оон Ол мынча дээн: «Силер боттарыңарның сагылга-дүрүмнериңер сагыыр дээш, Бурганның айтыышкыннарын тоовайн каапканыңар кончуг-ла эки-дир! 10 Моисей силерге Бурганның айтыышкынын дамчыткан-на болгай: „Ачаң биле аваңны хүндүлеп чор“, ол ышкаш: „Ачазын азы авазын бак сөглээр кижини өлүмге онаар херек“ ^h. 11 – 12 А силерниң чугааңар ёзугаар кандыг боор-дур? Ава-ачазынга: „Менден алыр ужурлуг чүвеңерни Бурганга өргүүрүм ол-дур“– дээр кижи бар болза, силер аңаа ава-ачазынга чүнү-даа кылырын чөпшээревейн баар-дыр силер. 13 Силер ооң-биле Бурганның сөзүн, боттарыңарның-на саналдаан чаңчылдарыңар дээш, күш чок болдуруп турар-дыр силер. Өске-даа шак ындыг чүүлдерни эңдере кылып чоруур-дур силер».

14 Иисус чонну база катап чыып алгаш, мынча дээн: «Шуптуңар Мени дыңнааш, билип аарын кызыңар. 15 – 16 Кижиже дашкаартан кирип кээр чүү-даа чүве ону бужартадып шыдавас ⁱ. Кижиниң бодундан үнүп кээр чүве харын ону бужартадыр» ^{▼▼ Өске бурунгу сөзүглелдерде бо сөстерге «Дыңнаар кулаа бар кижи дыңназын!» деп сөстерни немээн (Мф. 11:15; Мк. 4:9 көр).}.

17 Иисус чонну каапкаш, бажыңче кирип кээрге, өөреникчилери демги угаадыглыг чугааның дугайында Оон айтырган. 18 Ол оларга мынча дээн: «Таанда-ла силер ам-даа билип шыдавааныңар ол бе? Кижиже дашкаартан кирип кээр чүү-даа чүве ону бужартадып шыдавас дээрзин көрбээниңер ол бе? 19 Чүге дээрге ол кижиниң чүрээнче эвес, а ишти-хырнынче киргеш, оон мага-боттан үне бээр болгай». (Шак ынчалдыр Ол бүгү аъш-чем аймаан арыг деп чарлаан.) ^k

20 Оон ыңай мынча дээн: «Кижиниң бодундан үнүп турар чүве харын ону бужартадыр ^l. 21 Кижиниң иштинден, ооң чүрээнден үнер чүүлдер бо-дур ^m: бузуттуг-бак бодалдар, самыыраар чорук, ооржу база өлүрүкчү чорук, 22 кады чурттаан эжинге шынчы эвес чорук, чазый чорук, кара сагыш, меге, туттунмас самыыраашкын, адааргал, хоп-нүгүл, бодун тогдунары база сээдең чорук. 23 Кижиниң иштинден үнер бо бүгү бузут харын ону бужартадып турар».