Mar 7:31-8:10 | TyvTUV | STEP | Иисус Тирниң чоок-кавызындан үнгеш, Сидон хоорайны таварып эрткеш , Он-хоорай девискээрин таварыштыр Галилея хөлүнче чорупкан .

‏ Mark 7:31-37

Иисустуң үнү чок, дүлей кижини экирткени

31 Иисус Тирниң чоок-кавызындан үнгеш, Сидон хоорайны таварып эрткеш ^a, Он-хоорай девискээрин ^b таварыштыр Галилея хөлүнче чорупкан ^c. 32 Ол черге улус үнү чок, дүлей бир-ле кижини Иисуска эккелгеш, аңаа холун дегзип, экиртирин Оон дилээн ^d. 33 Иисус ону кыдыынче аппаргаш, Бодунуң салааларын ооң кулактарынче суккаш, оон дүкпүрүпкеш ^e, демги кижиниң дылынга дээй каапкан. 34 Ол ооң соонда карактарын дээрже шиглей көрүнгеш, хандыр улуг тынгаш, аңаа: «Эффафа!» – дээн. (Ол дээрге «Ажыттын!» дээни ол.) 35 Демги кижи ол-ла дораан дыңнап турар апарган, ооң дылы чештинип, иле-тода чугаалап эгелээн. 36 Иисус бо дугайында кымга-даа чугаалаваңар деп дужааган. Ынчалза-даа Ол шыңгыы хораан тудум, шупту улустуң ол бүгү дугайында медээни тарадыры дам баар болган ^f. 37 Олар аажок кайгап-харап, мынча деп турганнар: «Ооң кылып турар хамык чүвези эки-дир. Ол дүлей улусту – дыңнап турар, үнү чок улусту – чугаалап турар кылып каар-дыр!»

‏ Mark 8:1-10

Иисустуң дөрт муң кижини тоттурганы

(Мф. 15:32-39)

1 Ол-ла хүннерде Иисустуң чанынга база катап мөөң чон чыглып келген, а оларның чиир чеми чок болган. Иисус өөреникчилерин кый деп алгаш, оларга мынча дээн: 2 «Бо улусту кээргээр-дир мен ^g: олар Мээң чанымга үш хонук турду, а ам чиир чеми артпаан-дыр. 3 Оларны бажыңнарынче аш хевээр чорудуптар болзумза, орукка харыксырап каарлар, чамдыызы кайы ырактан келген-не болгай».

4 Ооң өөреникчилери: «Мындыг ээн черге бо улустуң шуптузун чемгериптер хире хлебти кайыын тып алыр бис?» – деп кайгай бергеннер ^h.

5 Иисус олардан: «Силерде каш хлеб барыл?» – деп айтырган.

Олар: «Чеди» – деп харыылаан.

6 Иисус хамык улуска черже олуруптарын дужааган. Оон чеди хлебти алгаш, аъш-чем дээш Бурганга өөрүп четтиргеш, оларны кезектей үзе тырткылааш, өөреникчилеринге дамчыдып берген. Олар хлебти чонга үлеп берген. 7 Өөреникчилеринде аңаа немей каш бичежек балык база бар болган. Иисус Бурганга өөрүп четтиргеш, балыктарны база чонга үлеп бээрин өөреникчилеринге дужааган. 8 Улус тоткуже чиген, а арткан кескиндилер-биле чеди аргаан хааржакты долдуруп алганнар. 9 Аңаа 5000 хире кижи турган. Иисус оларны чандырыпкан, 10 а Боду ол-ла дораан өөреникчилери-биле кады хемеге олурупкаш, Далмануфа девискээринге эжиндирип келген.