Mark 8:31-38
Иисустуң хилинчектенип өлүрүнүң дугайында баш удур чугаалааны
(Мф. 16:21-28; Лк. 9:22-27)
31Иисус ынчан оларны мынча деп өөредип эгелээн: «Кижи амытан Оглу хөй хилинчекти көрүп эртер ужурлуг-дур, Ону баштыңнар, Бурганның дээди бараалгакчылары база ном-хоойлу тайылбырлакчылары тооп көрбес a, а оон өлүртүп каар, ынчалза-даа Ол үшкү хүнде катап дирлип кээр b». 32Ол дугайында Иисус ажыы-биле чугаалап берген c. А Пётр Ону кыдыынче кый депкеш, Ооң-биле чөрүже берген. 33Иисус Бодунуң өөреникчилеринче көрнүп келгеш, Пётрга шыңгыы чугаалаан: «Менден чайлап чор, эрлик! d Бодалдарың Бурганныы эвес, а улустуу-дур e». 34Иисус ооң соонда чонну болгаш өөреникчилерин кый деп алгаш, оларга мынча дээн: «Мени эдерер дээн кижи бар болза, ол бодунуң күзел-бодалындан ойталазын база бодунуң белдир-ыяжын чүктеп алгаш, Мени эдерип чорупсун f. 35Бодунуң амы-тынын камгалап алыр дээн кижи амы-тынын ышкынып аар, а амы-тынын Мен дээш база Буянныг Медээ дээш ышкынган кижи g амы-тынын камгалап аар. 36Бүгү делегейни холга киирип-даа алза, амы-тынын чок кылып аар болза, ооң ол кижиге ажыы чүл? h 37Амы-тынын дедир эгидер дээш, ол кижи чүнүң-биле төлээрил? i 38Бо самыыраан база бачыттыг салгалдың аразынга чурттап чорааш j, Менден болгаш Мээң сөстеримден ыядып-човаар кижи бар болза k, Кижи амытан Оглу база дээрниң ыдыктыг төлээлери-биле кады Бодунуң Адазының өндүр чырыынга бүргеткен чедип келгеш l, ол кижиден ыядып-човаар болгай». Mark 9:1
1Аңаа немей мынча дээн: «Алыс шынны силерге чугаалап тур мен: мында турар улустуң чамдыызы, өлбейн чыткаш-ла m, Бурганның күчү-күш-биле бүргеткен Чагыргазы келген турарын көрүп каар».
Copyright information for
TyvTUV