Mat 11:2-19 | TyvTUV | STEP

‏ Matthew 11:2-19

2 – 3 Кара-бажыңга чыткан Иоанн ^a Христостуң кандыг ажыл-үүле кылып турарын дыңнааш, Олче бодунуң өөреникчилерин ^{▼▼ Өске бурунгу сөзүглелдерде «Бодунуң ийи өөреникчизин» деп бижээн.}: «Чедип кээр ужурлуг Кижи Силер силер бе азы өскезин манаар бис бе?» ^c – деп айтырары-биле чорудупкан.

4 Иисус оларга мынча деп харыылаан: «Көрүп база дыңнап турар чүвеңерни Иоаннга дамчыдып чедиңер: 5 согурлар каракталып, аскактар кылаштап, кеш аарыглыглар арыгланып, дүлейлер дыңнап, өлгеннер катап дирлип, ядыыларга Буянныг Медээни дыңнадып турарын чугаалаар силер ^d. 6 Меңээ бүзүрелин чидирбес кижи амыр-чыргалдыг боор» ^e.

7 Иоанның өөреникчилери чоруй баарга, Иисус чонга ооң дугайында чугаалап эгелээн: «Ээн кургаг ховуже чүнү көөр дээш барып чордуңар? ^f Хатка чайгаткан кулузунну бе? 8 Ындыг эвес болза, чүнү көрүп чордуңар? Каас-коя хептиг кижини бе? Ынчалза-даа каас-коя хептиг улус хааннар ордуларынга чурттаар болгай. 9 Чүнү көөр бис деп бодадыңар? Бурганның медээчизин бе? ^g Ийе, медээчини. Харын силерге чугаалап тур мен: ол – медээчиден-даа артык кижи-дир. 10 Бижилгеде ол дугайында Бурганның: „Көр даан, Мээң төлээм Сээң мурнуңда орукту белеткеп берзин дээш, ону Сени мурнай чорудуп тур мен“ ^h – дээн кижизи ол-дур. 11 Алыс шынны силерге чугаалап тур мен: чер кырынга чурттап чораан бүгү улустуң аразында Иоанн Медеглекчиден артык бедик кижи чок ⁱ. Ынчалза-даа Дээрниң Чагыргазында эң чөгенчиг кижи оон улуг боор. 12 Иоанн Медеглекчиниң суртаалдап эгелээн хүннеринден эгелээш, амдыгаа чедир Дээрниң Чагыргазынга удур халдаашкын чоруп келген база хөй улус Чагырганы күш-биле эжелеп алыксап турар ^j.

13 Бурганның хамык медээчилери болгаш ыдыктыг хоойлу Иоанның кээр мурнунда ол бүгүнүң дугайында өттүр билип медеглеп турганнар ^{▼▼ Азы: «Бурганның хамык медээчилериниң болгаш ыдыктыг хоойлунуң өттүр билген медеглелдери Иоаннче эккел чораан».}. 14 А хүлээп аар деп бодаар болзуңарза, Иоанн дээрге чедип кээр ужурлуг Илия ол-дур ^l. 15 Дыңнаар кулаа бар кижи дыңназын! ^m

16 Бо салгалдың улузун Мен кымның-биле деңнээйн? Олар базаар шөлүнге олуруп алгаш, бир чамдыызы өскелеринге мынча деп алгырышкан бичии уруглар олчаан-дырлар:

17 „Бис силерге лимбилеп бердивис,
а силер самнавадыңар.
Бис силерге кажыыдал ыры ырлап бердивис,
а силер ыглашпадыңар“.

18 Иоанн чедип келгеш, аъш-чем чивес, арага ишпес боорга ⁿ, олар: „Букшуураан“– дижир-дир. 19 Кижи амытан Оглу чедип келгеш, чемненир, ижер боорга ^o, олар: „Көрүңер, чазый, арагачы хей-дир, үндүрүг хавырыкчылары болгаш бачытка борашканнарның өңнүү-дүр“– дижир-дир ^p. А мерген угаан бодунуң ажыл-херээ-биле шынзыттынар».