Matthew 12:1-8
Амыр-дыш хүнү дугайында айтырыг
(Мк. 2:23-28; Лк. 6:1-5)
1Ол үеде, амыр-дыш хүнүнде, Иисус тарып каан шөлдү таварты бар чыткан. Ооң өөреникчилери аштааш, сыпта тараа баштарын үзе соккаш, ууштап чий бергеннер a. 2Фарисейлер ону көргеш, Аңаа мынча дээннер: «Көрүңер! Силерниң өөреникчилериңер амыр-дыш хүнүнде ыдыктыг хоойлунуң хораан чүвезин кылып турлар» b. 3Иисус ынчан олардан айтырган: «Боду-даа, кады чораан өөрү-даа аштай бээрге, Давид хаанның чүнү кылганын номчуваан силер бе? c 4Ол Бурганның өргээзинче киргеш, ооң боду-даа, кады чораан улузу-даа чип болбас, а чүгле Бурганның бараалгакчылары чиир ужурлуг ыдыктаан хлебти d чипкен болгай. 5Амыр-дыш хүнүнде Бурганның бараалгакчылары Бурганның өргээзинге ажылдап, оозу-биле ол хүннү сагывайн турарын, ынчалза-даа буруулуг диртпезин Моисейниң хоойлузундан номчуваан силер бе? e 6А мында Бурганның өргээзинден-даа артык чугула Кижи барын чугаалап тур мен f. 7Бижилгеде: „Өргүлдү эвес, энерелдиг бооруңарны күзеп тур мен“ g – дээн сөстерниң утказын билген болзуңарза, буруу чок улусту буруу шаппас ийик силер. 8Ийе, Кижи амытан Оглу – амыр-дыш хүнүнүң-даа Дээргизи-дир!»
Copyright information for
TyvTUV