Matthew 21:1-11
Иисустуң Иерусалимче байырлалдыг моорлап киргени
(Мк. 11:1-11; Лк. 19:28-38; Ин. 12:12-19)
1Олар Иерусалимге чоокшулап келгеш, Елеон дааның a чанында Виффагия суурга чедип келгенде, Иисус ийи өөреникчизин бурунгаар айбылапкаш, 2оларга чагып каан: «Мурнуңарда суурже барыңар. Аңаа баргаш, ол дораан кыс элчигенни болгаш ооң чанында аныяк элчигенчигешти баглап каан турарын көрүп каар силер. Оларны чешкеш, Меңээ эккелиңер. 3А кандыг-бир кижи силерден бир чүве айтырза: „Олар Дээргиге херек апарды“– деп харыылаңар. Оларны ээзи доп-дораан салыптар». 4– 5Медээчиниң аксы-биле: «Сион-кыска мынча деңер b:„Көр даан, Хааның сенче кел чыдыр.
Биче сеткилдиг Хааның элчиген, ажылчын элчиген оглу
мунуп алган кел чыдыр“» c – дээн сөстер ынчаар боттанганы ол d.
6Өөреникчилер чоруткаш, бүгү чүвени Иисустуң чугаалаан аайы-биле кылганнар. 7Олар элчигенчигешти иези-биле кады эккелгеш, хевин оларга чонай салгаш, Иисусту олуртупканнар. 8Эңдерик хөй чон хевин Ооң мурнунда орукка дөжей сала берген e, а өскелери ыяш будуктарын сыккаш, орукка чада салып чораан. 9Ооң мурнунга база соонга бар чыткан эңдерик хөй чон ыыткыр алгыржып турган: «Осанна! ▼
▼ Осанна – еврей дылда «Камгалап көрем» дээн (Ыд. ыр. 117:25 көр). Мында ол сөс иудейлерниң манап турары хаан – Мессияны алдаржыткан кыйгы кылдыр ажыглаттынган.
Давидтиң Оглунга g алдар-мактал!Дээрги-Чаяакчының өмүнээзинден кел чыдар Кижи алгадып-йөрээтсин!
Осанна! Өрү дээрде Бурганга алдар-мактал!» h
10Иисус Иерусалимче кирип кээрге, бүгү хоорай хөлзеп үнген. Улус: «Бо Кымыл?» – деп айтыржып турган. 11А мөөң чон: «Бо дээрге Бурганның медээчизи i Галилеяның Назарет чурттуг Иисус-тур» – деп харыылаар болган.
Copyright information for
TyvTUV