Mat 25:1-13 | TyvTUV | STEP | «Ол хүнде Дээрниң Чагыргазы мындыг үлегерге дөмей. Үс куткан деңнерин туткаш, күдээже уткуштур үнүпкен он кыс турган.

‏ Matthew 25:1-13

Он кыс дугайында угаадыглыг чугаа

1 «Ол хүнде Дээрниң Чагыргазы мындыг үлегерге дөмей. Үс куткан деңнерин туткаш, күдээже уткуштур ^a үнүпкен он кыс турган. 2 Оларның бежи угаанныг, а бежи мелегей чүве-дир. 3 Мелегей кыстар деңнерин ап алза-даа, немей кудар үзү чок болганнар. 4 А угаанныг кыстар деңнери-биле катай саваларда үзүн база ап алганнар. 5 Күдээ оол саадай бээрге ^b, бүгү кыстарның бажы согаш кыннып, удуй бергеннер. 6 Дүн ортузунда: „Көрүңер, күдээ кел чор! Ону уткуп үнүңер!“– деп кыйгы дыңналган. 7 Ол дораан хамык кыстар тура халышкаш, деңнерин кыпсып эгелээннер. 8 Мелегей кыстар угаанныгларынга: „Үзүңерден бичииден бериңерем, деңнеривис өжүп тур“– дээннер. 9 А угаанныг кыстар: „Чок, бербес бис, оон башка үс силерге-даа, биске-даа четпейн баар. Ооң орнунга садыгжыларже баргаш, садып алыңар“– деп харыылааннар. 10 Олар үс садып ап чоруур аразында, күдээ чедип келген. Белен турган беш кыс ооң-биле кады куда доюнче ^c кире бээри билек, оларның соондан эжикти хаапкан.

11 Ооң соонда арткан кыстар чедип келгеш: „Дээрги! Дээрги! Эжииң ажыдып көр!“– дээннер ^d. 12 А ол: „Чок, силерни билбезим ылап шын“– деп харыылаан ^e. 13 Ынчангаш серемчилелдиг болуңар ^f, чүге дээрге Кижи амытан Оглунуң чедип кээр ^{▼▼ Өске бурунгу сөзүглелдерде «Кижи амытан Оглунуң чедип кээр» деп сөстер таварышпайн турар.} хүнүн-даа, шагын-даа билбес болгай силер» ^h.