Matthew 26:36-46
Иисустуң Гефсиманияга Бурганга мөргүл кылганы
(Мк. 14:32-42; Лк. 22:39-46)
36Иисус оон өөреникчилери-биле кады Гефсимания дээр черге чедип келгеш, оларга мынча дээн: «Маңаа олуруңар, Мен ол аразында дөө ынаар барып, мөргүп алыйн». 37Ол Пётрну база Зеведейниң ийи оглун эдертип алгаш a, качыгдап, ундарап эгелээн. 38Иисус ынчан оларга мынча дээн: «Качыгдал мээң сеткилимни өлүмнүү-биле карартыр базып тур b. Маңаа туруңар, Мээң-биле кады сергелеңнеп, удуваңар». 39Иисус олардан элээн ырай бергеш, черге доңгайып чыдыпкаш, мөргүп эгелээн c: «Ачай! Болдунар-ла болза, хилинчектиң бо дашказы Менден чайлай берзин! d Ындыг-даа болза, бүгү чүве Мээң эвес, а Сээң күзел-сорууң ёзугаар болзун» e. 40Иисус өөреникчилеринче ээп келгеш, оларның удуп чыдарын көргеш, Пётрга мынча дээн: «Силер Мээң-биле кады оода чаңгыс шак иштинде сергек болуп шыдавааныңар ол бе? 41Күткүлгеге алыспас дээш f, серемчилелдиг болуп, мөргүңер. Сеткил-сагыш – сергек, а мага-бот – суларгай болгай». 42База катап ырадыр кылаштай бергеш, Иисус мынчаар мөргүй берген: «Ачай! Хилинчектиң бо дашказы Менден чайлаттынмайн, ону Мен албан ижер ужурлуг болзумза, Сээң күзел-сорууң чогуп бүтсүн! g» 43Ол ээп кээрге, өөреникчилери ам база удуп чыткан: оларның карактары шимдинип турган. 44Оларны каапкаш, катап ырадыр кылаштай бергеш, Иисус биеэги-ле сөстери-биле үшкү удаа мөргүй берген. 45Иисус оон өөреникчилеринче ээп келгеш, оларга мынча дээн: «Силер ам-даа удуп дыштанмышаан силер бе? Дыңнаңар, шак-үе келген-дир h, Кижи амытан Оглун бачыттыглар холунга тудуп берип турар-дыр i. 46Тургулаңар, чоруулуңар! Саттыныкчы мырыңай бо келди, көрүңер!»
Copyright information for
TyvTUV