Mat 3:1-12 | TyvTUV | STEP | Ол хүннерде Иудеяның ээн кургаг ховузунга Иоанн Медеглекчи чедип келгеш, суртаалдап эгелээн.

‏ Matthew 3:1-12

Иоанн Медеглекчиниң суртаалы

(Мк. 1:1-8; Лк. 3:1-9, 15-17; Ин. 1:19-28)

1 Ол хүннерде Иудеяның ээн кургаг ховузунга Иоанн Медеглекчи ^a чедип келгеш, суртаалдап эгелээн. 2 Ол: «Бачыдыңар миннип, Бурганче эглиңер! Дээрниң Чагыргазы чоокшулап келген-дир ^b» – деп чугаалап турган. 3 Иоанның дугайында Исайя медээчи мынча деп чугаалаан турган:

«Ээн кургаг ховуда алгырган кижиниң үнү дыңналган:
„Дээрги-Чаяакчыга оруктан белеткеңер!
Ооң эртер кокпаларын дорттап бериңер“» ^c.

4 Иоанн теве дүгүнден кылган хептиг болгаш белинде хөм курлуг турган ^d, а чиир чеми шартылаа болгаш ховунуң ары чигири болган ^e. 5 Улус аңаа ынчан Иерусалимден, бүгү Иудеядан болгаш Иордан хемниң чоок-кавызында суурлардан кээп турган. 6 Боттарының бачыттарын ажыы-биле билинген улусту ^f Иоанн Иорданның суунга суп турган.

7 Аңаа сугга суктурары-биле хөй фарисейлер болгаш саддукейлер кээп турарын көргеш, Иоанн оларга мынча дээн: «Силер, чылан сыскындылары! ^g „Бурганның кел чыдар килеңинден чайлай бээр бис“деп ^h, силерни кым сагыш алындырды? 8 Бурганче ээлгениңерниң херек кырында үре-түңнелин көргүзүңер! 9 Чүгле: „Бистиң адавыс – Авраам“ ⁱ – деп сөстер-биле боттарыңарны аргалаарын семевеңер! Бурган бо чыдар даштардан-даа Авраамга ажы-төл чаяап шыдаар дээрзин силерге чугаалап тур мен. 10 Балды ыяштарның дөзүн кезеринге белен-дир. Эки чимис бербестээн ыяштарны одура шапкаш, отче киир октаптар ^j.

11 Бачыдыңар миннип, Бурганче ээлгениңерниң демдээ кылдыр, силерни сугже суп тур мен. Ынчалза-даа менден күчү-күштүг Кижи мээң соомдан чоруп олурар ^k. Мен Ооң идиин-даа тудуп алгаш чоруурунга төлеп чок мен. Ол силерни Ыдыктыг Сүлдеже, отче сугар-дыр ^l. 12 Тараа үрезинин саваңдан арыглаар айыыр шагда-ла Ооң холунда-дыр ^m, Ол тараа үрезинин үүжелей урар уургайынга чыып алыр, а саваңны өшпес отка өрттедиптер» ⁿ.