Num 20:14-21 | TyvTUV | STEP | Моисей Кадестен Эдомнуң хаанынче төлээлекчилерин чорудуп, сөс дамчыткан: «Силерниң ха-дуңмаңар болур израиль чон мону дамчыдып тур . Биске таварышкан хамык бергедээшкиннер дугайында билир болгай силер.

‏ Numbers 20:14-21

Эдомнуң Израильди эрттирбейн барганы

14 Моисей Кадестен Эдомнуң хаанынче төлээлекчилерин чорудуп, сөс дамчыткан: «Силерниң ха-дуңмаңар болур израиль чон мону дамчыдып тур ^a. Биске таварышкан хамык бергедээшкиннер дугайында билир болгай силер. 15 Бистиң ада-өгбевис Египетче көжүп чоруй барган турган, ол черге үр чурттаан бис ^b. Египетчилер бисти, ада-өгбевисти бак көрүп турган ^c. 16 А бис Дээрги-Чаяакчыдан дуза дилеп кыйгырарывыска, Ол бистиң үнүвүстү дыңнап кааш ^d, Бодунуң төлээзин чорудуп, бисти Египеттен үндүрүп эккелген ^e. Бис ам силерниң кызыгаарыңар кыдыында Кадес хоорайда чедип келдивис. 17 Силерниң чериңер таварты эрте бээрин биске чөпшээреп көрүңер. Силерниң шөлдериңерни, виноград тараан черлериңерни базып эртпес бис, кудуктарыңардан суг узуп ишпес бис, Хаан Оруу-биле ^{▼▼ Хаан Оруу – мурнуу чүкте Акаба мугулдурдан соңгу чүкте Дамаск хоорайга чедире бээр кол орук.} чоруптар бис. Силерниң кызыгаарларыңарны эртпээн шаанда, оруктан оң-даа, солагай-даа талаже эгбес бис ^g».

18 Ынчалза-даа эдом чон аңаа: «Бистиң черивис дамчыштыр эртпеңер, оон башка хылыжывыс туткаш, силерге удур чаалажып үнер бис» – деп харыылаан.

19 Израиль чон аңаа: «Чүгле улуг орук-биле эрте бериксеп тур бис. А бир эвес бис азы мал-маганывыс силерниң сууңарны ижер болзувусса, ол дээш төлээр бис, чүгле эрте кылаштай берээли, дилеп турар чүвевис чүгле ол-дур!» – деп дамчыткан ^h.

20 А Эдом аңаа: «Эртпеңер!» – деп харыылааш, хөй санныг аг-шерии-биле база күчүлүг холу-биле Израильге удур тулчур дээш үнүп келген. 21 Ынчангаш эдом бодунуң девискээрин таварты эртерин Израильге чөпшээревээн. Израиль ону кыдыы-биле оюп эрте берген ⁱ.