Num 20:2-13 | TyvTUV | STEP | Ижер суу чок боорга, чон Моисей биле Ааронга удур чыглып келген .

‏ Numbers 20:2-13

Моисейниң частырыы

2 Ижер суу чок боорга, чон Моисей биле Ааронга удур чыглып келген ^a. 3 Израиль чон Моисей-биле алгыжып: «Бистиң ха-дуңмавыс Дээрги-Чаяакчының мурнунга өлү берген өйде бис база өлү бээривис кай! ^b 4 Дээрги-Чаяакчының чонун чүге бо ээн кургаг ховуже эккелдиңер, бисти маңаа мал-маганывыс-биле кады өлзүн дээш бе? 5 Бисти Египеттен чүге үндүрүп эккелдиңер, шак бо багай, тараа тарыттынмас, фига ыяштары-даа, виноград-даа, гранат чимистери-даа чок, ижер суг безин тывылбас черже эккээр дээш бе?» – деп турганнар. 6 Моисей биле Аарон чыылган чондан ырап, Ужуражылга майгынынче кирер черже чорупкаш, доңгая кээп дүжерге ^c, Дээрги-Чаяакчының өндүр чырыы оларга көстүп келген.

7 Дээрги-Чаяакчы Моисейге мынча деп чугаалаан: 8 «Дуу ол даянгыышты ап алгаш, Аарон акың-биле кады чонну чыггаш, олар көрүп турда, бо чалымга бодунуң иштинде суун бээрин чугаала. Ынчалдыр оларга чалымдан сугну аксып үндүрүп бээр сен, чонга суг ижиртип, ооң мал-маганын суггарар сен».

9 Моисей Дээрги-Чаяакчының мурнунда турган даянгыышты Ооң дужаалын ёзугаар ап алган. 10 Моисей биле Аарон чонну чалым чанынга чыып алган. Моисей оларга: «Үймээнчи улус, дыңнаңар, бо чалымдан силерге сугдан аксып берээли бе?» – дээн ^d. 11 Ол холун көдүргеш, чалымны даянгыыжы-биле ийи катап кагарга, хөй суг аттыгып үнүп, чон-даа, ооң мал-маганы-даа ол сугну ижип алган. 12 А Дээрги-Чаяакчы Моисей биле Ааронга: «Меңээ бүзүревейн барып, Мээң ыдыктыымны израиль чон көрүп турда, хүндүлевээниңер дээш, бо чонну Мээң оларга берип турарым черже баштап алгаш, кирбес силер ^e» – дээн.

13 Ол дээрге Мериваның ^{▼▼ Мерива – «Алгыш-кырыш» дээн уткалыг ат (Хост. 17:7 көр).} суу деп чер-дир. Ооң чанынга израиль чон Дээрги-Чаяакчы-биле алгышкан. Дээрги-Чаяакчы аңаа Бодунуң ыдыктыын көргүскен.