1Ch 18 | UznUzbC | STEP | Бирмунча вақт ўтгач, Довуд яна Филистларга ҳужум қилиб, уларни мағлуб қилди. Гат шаҳри ва унинг атрофидаги қишлоқларни Филистлардан тортиб олди.

‏ 1 Chronicles 18

Довуднинг жангдаги ғалабалари

1 Бирмунча вақт ўтгач, Довуд яна Филистларга ҳужум қилиб, уларни мағлуб қилди. Гат шаҳри ^{▼▼ Гат шаҳри — 13:13 изоҳига қаранг.} ва унинг атрофидаги қишлоқларни Филистлардан тортиб олди.

2 Сўнг Мўаб халқини ҳам мағлуб қилди. Мўаб халқи Довудга қарам бўлиб, ўлпон тўлайдиган бўлишди.

3 Зўво ^{▼▼ Зўво — бу юрт Дамашқдан шимолда жойлашган эди.} шоҳи Ҳададзар Фурот дарёси бўйларига юриш қилиб, ўша ерларда ўз ҳокимиятини ўрнатмоқчи бўлган бир пайтда Довуд унга ҳужум қилди. Довуд Ҳададзарни Хомат шаҳри ёнида тор–мор этди. 4 Ҳададзарнинг 1000 та жанг аравасини, 7000 отлиқ ва 20.000 пиёда сипоҳини асирга олди. Ўзининг 100 та жанг араваси учун керакли отларни қолдириб, бошқа ҳамма отларни майиб қилди.

5 Дамашқдаги Орам халқи Зўво шоҳи Ҳададзарга ёрдамга келган эди, Довуд улардан 22.000 кишини ўлдирди. 6 Сўнг Дамашқдаги Орам халқининг шаҳарларига ўзининг қўнолғаларини жойлаштирди. Орам халқи ҳам Довудга қарам бўлиб, ўлпон тўлайдиган бўлди. Шундай қилиб, Довуд қаерга бормасин, Эгамиз уни зафарга эриштирди.

7 Довуд Ҳададзарнинг аъёнлари кўтариб юрадиган олтин қалқонларни қўлга киритиб, Қуддусга келтирди. 8 Яна Ҳададзарнинг қўли остидаги шаҳарлари бўлган Тивхат ва Хундан кўп бронза олиб келди. Кейинчалик Сулаймон бу бронзадан ҳовуз, устунлар ва ҳар хил ашёлар ясаттирди ^{▼▼ Сулаймон…ясаттирди — 3 Шоҳлар 7:13-26, 40-45 га қаранг.}.

9 Хомат ^{▼▼ Хомат — бу юрт Зўво юртидан шимолда жойлашган эди.} шоҳи Тўах ^{▼▼ Тўах — ибронийча матнда бу исмнинг бошқа варианти Тўву (шу бобнинг 10–оятида ҳам бор). Унинг Тўах деган шакли 2 Шоҳлар 8:9 дан олинган.}: “Довуд Ҳададзарнинг бутун лашкарини мағлуб қилибди” деган хабарни эшитиб қолди. 10 Тўах шоҳ Довуднинг ҳузурига ўғли Ёрамни ^{▼▼ Ёрам — ибронийча матнда бу исмнинг бошқа варианти Ҳадорам. Унинг Ёрам деган шакли 2 Шоҳлар 8:10 дан олинган.} юбориб, қутлади, жангда Ҳададзардан ғолиб келгани учун Довудни олқишлади. Тўах Ҳададзар билан узоқ вақтдан бери уришиб келарди. У Довудга олтин, кумуш, бронза идишларни тортиқ қилиб юборди. 11 Шоҳ Довуд бу инъомларни бошқа юртлардан — Эдом, Мўаб, Оммон, Филист ва Омолекдан тортиб олиб келган олтину кумушлар билан бирга Эгамизга назр қилди.

12 Зеруя ўғли Абушай Туз водийсида ^{▼▼ Туз водийси — Ўлик денгизнинг жанубидаги ўлка.} Эдом халқидан 18.000 кишини ҳалок қилди. 13 У Эдом юртига ^{▼▼ Эдом юрти — Ўлик денгизнинг жанубида жойлашган эди.} ўз қўнолғаларини жойлаштирди. Эдом халқи Довудга қарам бўлди. Довуд қаерга бормасин, Эгамиз уни зафарга эриштирди.

14 Довуд бутун Исроилда шоҳлик қилар экан, халқини одиллик билан бошқарарди. 15 Зеруя ўғли Йўаб — лашкарбоши, Охилуд ўғли Ёҳушафат мушовир ^{▼▼ мушовир — луғавий маъноси маслаҳатчи. Бу ўринда хабарчи. У шоҳлик ичидаги ва халқ орасидаги хабарни шоҳга, шоҳнинг фармонларини халққа етказиб турган.} эди. 16 Охитоб ўғли Зодўх билан Абуатар ўғли Охималек ^{▼▼ Охималек — ибронийча матнда бу исмнинг бошқа варианти Абумалек. Унинг Охималек деган шакли 2 Шоҳлар 8:17 дан олинган.} — руҳоний, Сараё ^{▼▼ Сараё — ибронийча матнда бу исмнинг бошқа варианти Шавшо. Унинг Сараё деган шакли 2 Шоҳлар 8:17 дан олинган.} мирза эди. 17 Ёҳайидо ўғли Бинаё Харетлик ва Палатлик қўриқчиларнинг ^{▼▼ Харетлик ва Палатлик қўриқчилар — Довуд ёллаган бу муҳожир сипоҳлар шоҳнинг шахсий қўриқчилари бўлиб хизмат қилган.} бошлиғи эди. Довуднинг ўғиллари саройда юксак лавозимдаги аъёнлар эдилар.