Job 26 | UznUzbC | STEP | Аюб шундай деб жавоб берди:

‏ Job 26

Аюбнинг тўққизинчи нутқи: Худонинг беқиёс буюклиги ҳақида

1 Аюб шундай деб жавоб берди:

2 “Ожизга берган ёрдаминг шуми?
Кучсизга шундай мадад керакми?!
3 Ақлсизга бирам ўргатиб қўйдинг–а!
Берган маслаҳатларинг бирам маънолики!
4 Ким ўргатди ўзи сенга бу доно гапларни?!
Сен орқали кимнинг руҳи гапирган ўзи?!

5 Сувлар остидаги ўликлар диёрида ^{▼▼ Сувлар остидаги ўликлар диёрида… — қадимда Исроил халқининг тасаввурига кўра, ер теп–текис бўлиб, ер остида буюк денгиз бор эди. Ўликлар диёри ўша денгиз остида эди.}
Марҳумларнинг руҳи қалтирайди.
6 Худонинг олдида ўликлар диёри ^{▼▼ ўликлар диёри — ибронийча матнда Шеўл. 7:9 изоҳига қаранг.} очиқдир,
Ҳалокат диёрининг ^{▼▼ Ҳалокат диёри — ибронийча матнда Абаддўн. Бу сўз Шеўлни, яъни ўликлар диёрини билдиради.} ҳам ёпинчиғи йўқ.
7 Худо бўшлиқ устига самони ёйди,
Ерни эса бўшлиққа осиб қўйди.
8 Худо булутларни ёмғир сувига тўлдиради,
Булутлар эса сувнинг оғирлигидан йиртилиб кетмайди.
9 Худо тўлин ойнинг юзини ^{▼▼ тўлин ойнинг юзи — ёки Ўз тахти.} яшириб,
Булутлар билан ўраб қўяди.
10 Худо уфқни бепоён уммон узра ёйиб,
Ёруғлик ва қоронғилик орасига чегара қўйди.
11 Худо осмоннинг устунларига ^{▼▼ осмоннинг устунлари — 22:14 изоҳига қаранг.} дўқ қилса,
Улар қўрқувдан қалтираб тебранади.
12 Худо Ўз қудрати билан денгизни мағлуб қилди ^{▼▼ Худо…денгизни мағлуб қилди — 9:8 нинг иккинчи изоҳига қаранг.},
Ўз заковати билан махлуқ Раҳобни ^{▼▼ Раҳоб — 9:13 изоҳига қаранг.} ҳалок қилди.
13 Ўз нафаси билан булутларни ҳайдаб,
Мовий осмонни очди.
Унинг қудрати қочаётган илонни ^{▼▼ илон — Раҳобга ишора. Раҳоб яна Левитан номи билан танилган. 3:8 ва Ишаё 27:1 га қаранг.} эзиб ташлади.
14 Булар Худо қилган ишларнинг кичик бир парчасидир,
Худди пичирлаб айтилган гапга ўхшайди!
Шундай экан, агар Унинг қудрати
Момоқалдироқдай гумбурласа, ким тушуна олади?”