Job 38 | UznUzbC | STEP | Шундан кейин Эгамиз қуюн орасидан Аюбга шундай деб айтди:

‏ Job 38

Эгамиз Аюбга жавоб беради

1 Шундан кейин Эгамиз қуюн орасидан Аюбга шундай деб айтди:

2 “Билмай туриб гапираётган ким?
Ким донолигимга гумон қиляпти?
3 Қани, эркакка ўхшаб белингни боғла,
Сени сўроқ қиламан, жавоб бер–чи.

4 Заминнинг пойдеворини қўйганимда қаерда эдинг?
Доно экансан, қани айт–чи!
5 Ер юзининг сарҳадларини белгилаган ким?
Ахир, ўзинг биласан–ку!
Ким ернинг устидан чизиқ ўтказди?
6 – 7 Ернинг пойдеворини нима ушлаб турибди? ^{▼▼ Ернинг пойдеворини нима ушлаб турибди? — қадимда Исроил халқининг тасаввурига кўра, ер теп–текис бўлиб, ер остида буюк денгиз бор эди, денгиз тубидан чиққан улкан устунлар ерни ушлаб турарди. Улар, бу устунларнинг остидаги пойдевор сирли, фақат Яратганга аёндир, деб тушунганлар.}
Тонг юлдузлари жўр бўлиб, қўшиқ куйлаганда,
Илоҳий зотлар ^{▼▼ Илоҳий зотлар — ибронийча матндан сўзма–сўз таржимаси Худонинг ўғиллари. 1:6 нинг биринчи изоҳига қаранг.} қувончдан ҳайқирганда
Ернинг тамал тошини ^{▼▼ тамал тоши — қадимги пайтларда қурилишда пойдевор учун қўйилган биринчи ва энг муҳим тош ҳисобланарди. Бу тош пойдеворнинг бир бурчагини ҳосил қилиб, бинонинг қолган қисми ўша тошнинг жойлашуви бўйича қуриларди.} қўйган ким?

8 Денгиз ер тубидан отилиб чиққанда,
Дарвозаларни ёпиб, тўсиб қўйган ким? ^{▼▼ Денгиз…тўсиб қўйган ким? — 9:8 га ва ўша оятнинг иккинчи изоҳига, 26:12 га қаранг.}
9 Ахир, Мен булутларни денгизга кийим қилиб қўйдим.
Денгизни қалин зулмат билан ўраб қўйган Менман.
10 Мен денгизга чегаралар белгиладим,
Денгизни тамбаланган дарвозалар билан тўсиб қўйдим.
11 Мен денгизга: «Фақат мана шу ергача келасан,
Сенинг мағрур тўлқинларинг шу ерда тўхтайди», деб айтдим.

12 Сен умрингда бирор марта, тонг отсин, деб буюрганмисан?
Ёки, шарқдан кун чиқсин, деб айтганмисан?
13 Қуёш нурига: «Ернинг тўрт бурчига тарқалиб,
Фосиқларни яширинган жойидан силтаб чиқаргин», деб айтганмисан?
14 Кун ёришар экан, матодаги безаклар каби
Муҳр босилган мум каби
Ер юзидаги қирлару водийлар ўз шаклини кўрсатади.
15 Фосиқларга нур берилмайди,
Уларнинг ёмон ниятда кўтарилган қўли синади.

16 Денгиз тубидаги булоқларни бориб кўрганмисан?
Сувлар тубида юриб, текшириб кўрганмисан?
17 Ўлим дарвозалари қаердалигини биласанми?
Зулмат дарвозаларини сенга кўрсатишганми?
18 Бу дунёнинг қанчалик улканлигини биласанми?
Агар шуларнинг ҳаммасини билсанг, Менга айт–чи!

19 Ёруғликнинг масканига олиб борадиган йўлни,
Зулматнинг турар жойини биласанми?
20 Уларни ўз жойларига олиб бора оласанми?
Ўша жойга қандай боришни биласанми?
21 Ҳа, сен биласан албатта!
Сен ёруғлик ва зулматдан олдин туғилгансан–да!
Қанчалик узоқ умр кўряпсан–а!

22 Қор сақланадиган омборхоналарни кўрганмисан?
Дўл сақланадиган омборларни–чи?
23 Мен уларни кулфат кунлари учун,
Уруш ва жанг кунлари учун сақлаб қўйганман.
24 Ёруғлик манбаига олиб борадиган йўл қани?
Шарқ шамоли чиқадиган жой қаерда?

25 Селу жалага ким йўл очиб берган?
Чақмоқнинг йўлларини ким белгилаган?
26 Ҳувиллаб ётган биёбонга,
Кимсасиз чўлга ким ёмғир ёғдиради?
27 Ташландиқ харобазорларни сувга қондириб,
У ерларда майсалар ўстирадиган ким?

28 Ёмғирнинг отаси борми?
Шабнамни ким дунёга келтирган?
29 Муз қаердан туғилади?
Самодан тушадиган қировга ким ҳаёт берган?
30 Сув тошлардай қотиб қолади,
Денгиз сатҳи музлайди.

31 Парвин юлдузларини сен боғлаб қўя оласанми?
Ҳулкар ^{▼▼ Парвин…Ҳулкар… — 9:9 нинг изоҳларига қаранг.} юлдузини ушлаб турган арқонларни еча оласанми?
32 Юлдуз туркумларини ўз мавсумида жойига бошлайсанми?
Катта айиқ ва кичик айиқ буржидаги юлдузларга йўл кўрсата оласанми?
33 Осмон қонунларини биласанми?
Сен ўша қонунларни ер юзига татбиқ қила оласанми?

34 Булутларга қараб бақириб кўргин–чи,
Қани, устингга ёмғир ёғармикан?
35 Сен чақмоқни чақтира оласанми?
У келиб, хизматингиздаман, дейдими?
36 Ким юракларга донолик берган?
Каллага ақл–идрокни ким солиб қўйган? ^{▼▼ …юраклар…Калла… — бу оятдаги икки ибронийча сўзнинг маъноси баҳсли. Баъзи олимларнинг фикри бўйича, ибронийча матндаги бу иккала сўз ибис (иссиқ мамлакатларда яшайдиган, лайлакка ўхшаш узун оёқ қуш) ва хўрозга нисбатан ишлатилган. Қадимги даврда одамлар: “Ибис қуши ва хўроз об–ҳаводан дарак беради”, деб ишонганлари учун бу паррандаларни ақлли ва доно деб ҳисоблар эдилар. Аммо бу ўринда булутларнинг икки тури назарда тутилган бўлиши ҳам мумкин.}
37 – 38 Қани, булутларни санашга кимнинг ақли етади?
Ер қақраганда, тупроқ қотиб, кесакка айланганда
Ким фалак мешларини ағдариб, ёмғир ёғдира олади?

39 – 40 Ғорларида яширин ётган,
Инларида кутиб ётган
Шернинг болаларини тўйдира оласанми,
Она шерга ўлжа топиб бера оласанми?
41 Қарғанинг болалари қорни очиб, дайдиб юрганда,
Менга фарёд қилганда эҳтиёжларини қондирган ким, ахир?