Psa 104 | UznUzbC | STEP | Эгамизга шукур айтинг, Унга сажда қилинг, Бошқа халқлар орасида Унинг ишларини билдиринг.

‏ Psalms 104

1 Эгамизга шукур айтинг, Унга сажда қилинг,
Бошқа халқлар орасида Унинг ишларини билдиринг.
2 Тараннум қилиб Уни, ҳамду сано ила қўшиқ айтинг,
Унинг жамики ажойиб ишларини сўзлаб беринг.
3 Эгамизнинг муқаддас номи ила фахрланинг,
Эгамизга юз бурганларнинг қалби шодликка тўлсин.
4 Қудратли Эгамизга юз буринг!
Унинг ҳузурида бўлишга интилинг.
5 – 6 Эй сизлар, Эгамизнинг қули Иброҳим насли,
Эй Ёқуб ўғиллари — Эгамизнинг танлаганлари,
Эгамиз қилган ажойиботларини эсда тутинг,
Унинг мўъжизаларини, чиқарган ҳукмларини унутманг.

7 У Эгамиз Худодир,
У бутун ер юзини адолатли ҳукм қилади.
8 Ўз аҳдини У то абад ёддан чиқармас,
Минглаб наслларга берган ваъдасини унутмас.
9 Риоя қилар У Иброҳим билан қилган аҳдига,
Исҳоққа қасам ичиб берган ваъдасига.
10 Ёқуб учун бу аҳдни бир қонун қилди,
Ҳа, Исроил учун абадий бир аҳд қилди.
11 Айтдики ^{▼▼ Айтдики… — Ибтидо 12:7, 17:8, 26:3, 28:13 га қаранг.}: “Канъон юртини сенга бераман,
Уни ўзингга абадий мулк қилиб оласан.”

12 Ўша вақтда уларнинг сони кам эди,
Ҳа, жуда камчилик эдилар.
Улар бу юртга келгинди эди.
13 Кезарди бир халқ орасидан бошқасига,
Бир шоҳликдан бошқа юртга.
14 Эгамиз ҳеч кимга уларни эзишларига йўл қўймади,
Уларни деб шоҳларга танбеҳ берди.
15 Айтдики: “Мен танлаганларга тегманглар,
Пайғамбарларимга ^{▼▼ Пайғамбарларим — Иброҳим, Исҳоқ, Ёқубга ишора.} зарар келтирманглар.”

16 Канъон юрти устига Эгамиз очарчилик юборди,
Битта қолдирмай егуликларга қирғин келтирди.
17 Улардан олдин одам юборди,
Ҳа, Юсуф ^{▼▼ Юсуф — Ибтидо 37:1-36, 39:1-41:57, 45:4-7 га қаранг.} қул каби сотилди.
18 Унинг оёқларига занжир урилди,
Бўйнидан темир ҳалқа ўтказилди.
19 Юсуфнинг сўзлари бажо бўладиган вақт келгунча,
Эгамизнинг каломи Юсуфни синади.
20 Миср шоҳи одам юбориб, Юсуфни қутқарди,
Элларнинг ҳукмдори уни озод қилди.
21 Юсуфни шоҳ саройининг бошқарувчиси қилиб тайин этди,
Жамики мулкининг ҳокими қилди.
22 Хоҳласа саройдаги аъёнларимни занжирбанд қилсин ^{▼▼ …аъёнларимни занжирбанд қилсин… — ёки …у аъёнларим устидан ҳукмронлик қилсин… ёхуд …у аъёнларимга кўрсатма берсин….},
Маслаҳатчиларимга донолик ила ўгит берсин деб, шундай қилди.

23 Сўнгра Исроил Мисрга келди,
Ҳа, Ёқуб насли Хом юртида ^{▼▼ Хом юрти — Мисрга нисбатан қўлланган шеърий усул. Хомнинг ўғли Мизра Миср халқининг бобокалонидир (Ибтидо 10:6 га ва ўша оятнинг иккинчи изоҳига қаранг).} мусофир бўлди.
24 Унинг халқини Эгамиз баракали қилди,
Душманларига қараганда, кўпайтирди.
25 Эгамиз Миср халқининг юракларини ўзгартирди,
Улар Эгамиз халқидан нафратланди,
Эгамизнинг қулларига қарши улар фитна уюштирди.

26 Сўнгра Эгамиз қули Мусони юборди,
Танлаб олган Ҳорунни бирга жўнатди.
27 Мисрликлар орасида, ўша Хом юртида
Иккаласи Эгамизнинг мўъжизаларини, ажойиботларини кўрсатди ^{▼▼ Мисрликлар орасида…мўъжизаларини, ажойиботларини кўрсатди — Чиқиш 7:8-11:10, 12:29-30 га қаранг.}.
28 Эгамиз зулмат юборди, Мисрни зулматга буркади,
Ахир, Мисрликлар Эгамизнинг амрларига итоатсизлик қилди ^{▼▼ …Ахир, Мисрликлар Эгамизнинг амрларига итоатсизлик қилди — қадимий юнонча ва сурёнийча таржималардан. Ибронийча матнда …Улар Эгамизнинг амрларига итоатсизлик қилмади, яъни …Мусо ва Ҳорун Эгамизнинг амрларига итоатсизлик қилмади.}.
29 Мисрнинг сувларини Эгамиз қонга айлантирди,
Жамики балиқларини нобуд қилиб ташлади.
30 Миср юрти тўлиб кетди қурбақаларга,
Етиб борди ҳатто ҳукмдорларнинг уйига.
31 Эгамиз амр берганда, сўналар галаси келди,
Миср бўйлаб бургалар қайнаб кетди.
32 Ёмғир ўрнига уларга Эгамиз дўл ёғдирди,
Бутун Миср бўйлаб чақмоқ чақтирди.
33 Узумзору анжирзорларини қуритди,
Мисрдаги дарахтларни қўпориб ташлади.
34 Эгамиз амр берганда, чигирткалар ^{▼▼ чигирткалар — баъзан тўда–тўда бўлиб келиб, далалардаги ҳосилга катта зарар етказадиган ҳашарот.} келди,
Сон–саноқсиз майда чигирткалар чиқиб келди.
35 Улар Мисрдаги бутун ўт–ўланни еб юборди,
Миср ўлкасидаги ҳосилни еб битирди.
36 Мисрдаги жамики тўнғич ўғилларни Эгамиз нобуд қилди,
Ҳа, уларнинг фахри, қут–барака тимсолини йўқ қилди.

37 Сўнг Эгамиз Ўз халқини
Олтину кумушга бойитиб ^{▼▼ …Эгамиз Ўз халқини Олтину кумушга бойитиб… — Чиқиш 12:33-36 га қаранг.} олиб чиқди.
Исроил қабилаларининг орасида қоқилиб қолгани бўлмади.
38 Мисрликлар Исроилдан қўрқиб, ваҳимага тушганди,
Улар кетгач, Миср халқи севинди.
39 Халқи устида ёпинчиқ бўлсин деб,
Эгамиз булутни ёйди,
Кечаси ёруғлик бўлсин деб, аланга берди ^{▼▼ …Эгамиз булутни ёйди, Кечаси…аланга берди — Чиқиш 13:20-22 га қаранг.}.
40 Исроил гўшт сўраганда Эгамиз беданалар берди,
Осмондан нон ёғдириб, уларни тўйғазди ^{▼▼ …Эгамиз беданалар берди, Осмондан нон ёғдириб, уларни тўйғазди — Чиқиш 16:2-15 га қаранг.}.
41 Эгамиз қояни очди, сув отилиб чиқди ^{▼▼ Эгамиз қояни очди, сув отилиб чиқди… — Чиқиш 17:1-7 ва Саҳрода 20:2-11 га қаранг.},
Саҳро бўйлаб дарёдай сув оқди.
42 Эгамиз Ўзининг муқаддас ваъдасини,
Ўз қули Иброҳимга берган ваъдасини ёдда тутди.
43 Шу боис халқини олиб чиқди севинч ила,
Ўз танлаганларини шодлик ҳайқириқлари ила.
44 Бегона халқларнинг юртларини уларга берди,
Ўша халқларнинг бойлигини Исроил мулк қилиб олди.
45 “Исроил халқи Менинг фармонимга риоя қилсин,
Менинг қонунларимга итоат этсин”, дея
Эгамиз мана шуларнинг ҳаммасини қилди.

Эгамизга ҳамду санолар бўлсин!