Psa 83 | UznUzbC | STEP | Ижрочилар раҳбарига. Соз жўрлигида айтиладиган Кўрах наслининг саноси.

‏ Psalms 83

1 Ижрочилар раҳбарига. Соз жўрлигида айтиладиган Кўрах наслининг ^{▼▼ Кўрах насли — 41:1 нинг биринчи изоҳига қаранг.} саноси.
2 Сенинг маконинг ажойибдир,
Эй Сарвари Олам!
3 Эй Эгам, Сенинг ҳовлингга кирмоқни
Жоним истар, ҳатто орзиқар.
Эй барҳаёт Худо! Қалбим,
Вужудим севинч ила Сенга куйлар.

4 Эй Сарвари Олам, Шоҳим, Худойим!
Қурбонгоҳинг ёнида чумчуқ ҳам бир уй топган,
Полапонларим учун жой топай дея,
Қалдирғоч ҳам ўзи учун бир ин қурган.
5 Бахтлидир Сенинг уйингда истиқомат қиладиганлар,
Улар доим Сенга ҳамду сано айтарлар.

6 Бахтлидир Сендан қудрат олган одамлар,
Қуддусни чин дилдан зиёрат қилишга интиладиганлар.
7 Қақраган сойликдан ^{▼▼ Қақраган сойликдан — ибронийча матнда Бака сойлиги. Ибронийчадаги бака сўзи қуруқ ерларда ўсадиган дарахтнинг бир турини билдириши мумкин. Баъзи иброний қўлёзмаларида, қадимий юнонча, сурёнийча ва лотинча таржималарда Йиғи сойлиги. Бу сойликнинг қаерда жойлашгани маълум эмас.} улар ўтар эканлар,
Булоқлар оқа бошлар,
Илк ёмғир бу ерни сув ҳавзаларига ^{▼▼ сув ҳавзалари — ёки баракалар.} тўлдирар.
8 Улар юрган сари кучайиб борар,
Эй Худо, улар Қуддусда ^{▼▼ Қуддус — ибронийча матнда Сион. 2:6 изоҳига қаранг.} ҳузурингда ҳозир бўлар.

9 Эй Парвардигори Олам — Эгам, эшит ибодатимни,
Эй Ёқубнинг Худоси, тинглагин мени.
10 Эй Худо, қара шоҳга — қалқонимизга,
Ўзинг мой суртиб танлаганга лутф қилгин.

11 Сенинг ҳовлиларингда ўтган бир кун
Афзалдир бошқа ерда ўтган минг кундан.
Фосиқларнинг чодирларида яшагандан кўра,
Бўлсайдим, эй Худойим, Сенинг уйингда дарвозабон.
12 Эй Парвардигор Эгам, қуёш ва қалқонсан,
Сен бизга меҳрибонлик кўрсатиб, шон–шуҳрат ато этасан.
Эй Эгам, тўғри юрганлардан
Неъматингни дариғ тутмайсан.
13 Эй Сарвари Олам,
Сендан умид қилган одам бахтлидир!