2Jo | UznUzbL | STEP |

‏

Mazkur maktub muallifi Iso Masihning shogirdi Yuhannodir. Yuhanno bu maktubini “Xudo tanlagan aziz xonim bilan uning bolalariga” deb yoʻllagan boʻlsa–da, bu yerda u imonlilar jamoatini va jamoat aʼzolarini nazarda tutgan boʻlsa kerak.

Muallif bu maktubi orqali imonlilarni bir–biriga mehr–oqibatli boʻlishga, Iso Masihga boʻlgan imonini mahkam tutishga va soxta paygʻambarlardan ehtiyot boʻlishga chaqiradi. Chunki bunday “paygʻambarlar” Masih ^{▼▼Masih — bu unvonni yahudiylar kelajakda ularni dushmanlaridan qutqaradigan va butun yer yuzidagi xalqlar ustidan hukmronlik qiladigan insonga nisbatan ishlatganlar. Eski Ahdda Masihning qiladigan ishlari haqida bashoratlar yozilgan. Yangi Ahdga koʻra Rabbimiz Iso oʻsha Masihdir. Toʻliqroq maʼlumotga ega boʻlish uchun lugʻatdagi MASIH soʻziga va XUDONING OʻGʻLI iborasiga qarang.}, yaʼni Xudoning Oʻgʻli inson boʻlib kelmagan ^{▼▼…Xudoning Oʻgʻli inson boʻlib kelmagan… — 1 Yuhanno 5:6 ning birinchi izohiga qarang.}, deb aytishgan. Muallif imonli birodarlarini tez orada koʻrish istagi borligini izhor etib, maktubini yakunlaydi.

Yuhannoning ikkinchi maktubi juda qisqa boʻlgani uchun boblarga boʻlinmagan.

‏ 2 John

Duoyi salom

1 Xudo tanlab olgan aziz xonim va uning bolalariga ^{▼▼ Xudo tanlab olgan aziz xonim va uning bolalari — maʼlum bir imonlilar jamoati va jamoat aʼzolari nazarda tutilgan boʻlsa kerak.} men — oqsoqoldan ^{▼▼ oqsoqol — yaʼni havoriy Yuhanno.} salom! Men sizlarni chin dildan yaxshi koʻraman, mengina emas, haqiqatni bilib olganlarning hammasi sizlarni yaxshi koʻradi. 2 Bu sevgiga dilimizdan joy olgan va to abad biz bilan boʻladigan haqiqat asos boʻldi.

3 Biz haqiqat va sevgi boʻyicha yashar ekanmiz, Otamiz Xudo va Otamizning Oʻgʻli Iso Masih beradigan inoyat, marhamat va tinchlik bizga ^{▼▼ Biz…biz — yunoncha matndan. Baʼzi yunon qoʻlyozmalarida Sizlar…sizlar.} doim yor boʻladi.

Haqiqat va mehr–muhabbat

4 Hurmatli xonim, farzandlaringizning bir nechtasi Otamiz Xudoning bizga bergan amrini ^{▼▼ Otamiz Xudoning bizga bergan amri — 1 Yuhanno 3:23 ga qarang.} bajarib, haqiqat yoʻlida yurayotgan ekanlar. Men bundan gʻoyat xursand boʻldim.

5 Sizdan bir iltimosim bor, bir–birimizni yaxshi koʻraylik. Sizga yangi amrni yozayotganim yoʻq, bu amr bizga boshidan berilgan. 6 Sevgi — biz Xudoning amrlariga amal qilishimizdan iborat. Sizlar bu amrni boshidan eshitgansizlar va unga amal qilib yashashingiz kerak.

7 Bularni yodingizda tutinglar, chunki dunyoda yolgʻonchilar koʻpayib ketgan. Iso Masih inson boʻlib kelganini ular tan olmaydilar ^{▼▼ Iso Masih inson boʻlib kelganini ular tan olmaydilar — 1 Yuhanno 2:22, 4:1-3 ga va 1 Yuhanno 5:6 ning birinchi izohiga qarang. Yana 1 Yuhanno 4:10, 5:5 ga qarang.}. Ularning har biri yolgʻonchi va Masihning dushmanidir! ^{▼▼ Masihning dushmani — 1 Yuhanno 2:18, 4:3 ga qarang.} 8 Shunday ekan, ogoh boʻlinglar! Mukofotingizni toʻliq olish uchun Masihga boʻlgan haqiqiy imoningizni ^{▼▼ Masihga boʻlgan haqiqiy imoningiz — yunoncha matndan soʻzma–soʻz tarjimasi biz bajargan ish, bu oʻrinda ularning Iso Masihga boʻlgan imoni nazarda tutilgan.} mahkam tutinglar. 9 Masih taʼlimotini ortda qoldirib, oʻzicha “jadallab ketgan” odamda Xudo yoʻq. Masih taʼlimoti boʻyicha yashagan odamda esa Ota ham, Oʻgʻil ham bor. 10 Agar biror kishi oldingizga kelib, sizlarga boshqacha taʼlimotni oʻrgatsa, uni uyingizga kiritmanglar, taklif ham qilmanglar. 11 Agar uni taklif qiladigan boʻlsangiz, uning yomon ishlariga sherik boʻlgan hisoblanasiz.

Xayrlashuv

12 Sizlarga aytadigan gapim koʻp, ammo bularni siyoh bilan qogʻozga yozishni istamadim. Undan koʻra, oldingizga borib, sizlar bilan yuzma–yuz gaplashaman, deb umid qilaman. Shunda shodligimiz ^{▼▼ shodligimiz — yunoncha matndan. Baʼzi yunon qoʻlyozmalarida shodligingiz.} tugal boʻladi.

13 Xudo tanlab olgan aziz singlingizning bolalari ^{▼▼ Xudo tanlab olgan aziz singlingizning bolalari — bu oʻrinda imonlilar jamoati nazarda tutilgan boʻlsa kerak. Ayniqsa, muallif qaysi jamoatda boʻlgan boʻlsa, oʻsha jamoatga ishora boʻlishi mumkin.} sizlarga salom yoʻllashyapti ^{▼▼ Yunoncha matndan. Baʼzi yunon qoʻlyozmalarida quyidagi soʻz oyatga qoʻshimcha qilingan: omin.}.