Amo 4 | UznUzbL | STEP | Ey Samariya ayollari, eshiting! Sizlar Bashandagi sigirlarday semirib ketgansiz , Kambagʻallarga jabr qilasiz, yoʻqsilni ezasiz, Erlaringizdan ichkilik talab qilasiz.

‏ Amos 4

1 Ey Samariya ^{▼▼ Samariya — Isroilning, yaʼni shimoliy shohlikning poytaxti.} ayollari, eshiting!
Sizlar Bashandagi ^{▼▼ Bashan — Jalila koʻlining shimoli–sharqida joylashgan boʻlib, oʻzining koʻm–koʻk yaylovlari va nasldor, sogʻlom chorvasi bilan mashhur edi.} sigirlarday semirib ketgansiz ^{▼▼ Sizlar…semirib ketgansiz… — Qonunlar 32:15 ga qarang.},
Kambagʻallarga jabr qilasiz, yoʻqsilni ezasiz,
Erlaringizdan ichkilik talab qilasiz.
2 Egamiz Rabbiy Oʻz muqaddas nomi haqi ont ichib demoqda:
“Shunday kunlar keladiki,
Sizlarni ilmoqlar bilan sudrab ketishadi,
Har biringizni qarmoqlar bilan tortib ketishadi.
3 Har biringizni devordagi teshiklar orasidan sudrab olib chiqishadi.
Itarib–itarib sizlarni Xermon tomon ^{▼▼ Xermon tomon — ibroniycha matnda Xarmon tomon. Xarmon degan joy haqida hech qanday maʼlumot yoʻq. Xarmon Xermon togʻining boshqa bir nomi boʻlishi mumkin. Xermon togʻi Samariya shahrining shimoli–sharqida, Ossuriya yurti tomonda boʻlgan.} olib ketishadi ^{▼▼ Itarib–itarib sizlarni Xermon tomon olib ketishadi… — ibroniycha matnda Sizlarni Xermon tomon uloqtirishadi…. Samariya xalqining toʻsatdan, zoʻravonlik bilan olib ketilishiga ishora.},
— deb aytmoqda Egamiz. —

4 Qani, endi Baytilga ^{▼▼ Baytil — 3:14 ning birinchi izohiga qarang.} borib gunoh qilavering!
Gilgalda gunohlaringizni koʻpaytiring! ^{▼▼ Gilgalda gunohlaringizni koʻpaytiring! — Isroil xalqi Gilgalda butlarga sajda qilish uchun sajdagoh qurgan edi (Xoʻsheya 4:15, 9:15 ga qarang).}
Saharda ^{▼▼ Saharda… — yoki Har kuni tongda…. Bu holatda kinoyali ohangda boʻrttirib gapirish anglashiladi. Ehtimol, ziyoratchilar sajdagohga kelganlaridan keyin, ertasi kuni tongda qurbonlik keltirganlar, uchinchi kuni esa ushrlarini berganlar.} qurbonliklar keltiring,
Ertasiga ushrlar ^{▼▼ ushr — har qanday daromadning oʻndan bir qismi.} olib keling!
5 Xamirturushli nonlarni Menga shukrona nazri qiling,
Koʻngildan chiqarib bergan qurbonligingiz haqida
Jar solib hammaga ayting,
Axir, bunday qilishni xoʻp yaxshi koʻrasiz, ey Isroil xalqi!
— deb aytmoqda Egamiz Rabbiy. —

6 Men hamma shaharlaringizda
Sizlarga tishingizning kirini soʻrdirdim,
Qishloqlaringizni nonga zor qildim,
Shunda ham sizlar Menga qaytmadingizlar,
— deb aytmoqda Egamiz. —

7 Ekinzorlaringizga suv kerak boʻlganda,
Men yomgʻir yogʻdirmadim.
Bir shaharga yomgʻir yogʻdirib,
Boshqasiga yogʻdirmas edim.
Bir dalani yomgʻir suviga toʻydirardim,
Boshqasiga yomgʻir yogʻdirmay, quritar edim.
8 Shunda ikki–uch shahar aholisi suv ichgani
Boshqa shaharga oyogʻini sudrab borardi.
Lekin sizlar suvga toʻymadingizlar.
Shunda ham Menga qaytmadingizlar,
— deb aytmoqda Egamiz. —

9 Men hosilingizga shira va oqqirov kasalini yubordim.
Chigirtkalar ^{▼▼ Chigirtkalar — baʼzan toʻda–toʻda boʻlib kelib, dalalardagi hosilga katta zarar yetkazadigan hasharot.} qayta–qayta bogʻu uzumzorlaringizni,
Anjir va zaytun daraxtlaringizni nobud qildi,
Shunda ham sizlar Menga qaytmadingizlar,
— deb aytmoqda Egamiz. —

10 Misrda boʻlgani kabi orangizga falokat ^{▼▼ falokat — Chiqish 12:29-30 ga qarang.} yubordim.
Yigitlaringizni qilichdan oʻtkazdim,
Otlaringizni dushmanlaringizga berdim.
Qarorgohingizdagi jasadlarning qoʻlansa hidi bilan
Dimogʻingizni toʻldirdim.
Shunda ham sizlar Menga qaytmadingizlar,
— deb aytmoqda Egamiz. —

11 Sadoʻm va Gʻamoʻrani ^{▼▼ Sadoʻm va Gʻamoʻra — aholisining oʻta buzuqligi oqibatida Egamiz vayron qilgan ikkita shahar (Ibtido 18:16-19:28 ga qarang).} yoʻq qilganim kabi,
Men koʻplaringizni yoʻq qildim.
Baʼzilaringizni esa olov ichidan qutqarganday qutqargandim.
Shunda ham Menga qaytmadingizlar,
— deb aytmoqda Egamiz. —

12 Shunday ekan, ey Isroil,
Men seni jazolayman.
Xudoning oldida hisob berishga tayyorlangin!”

13 Zero, Xudo togʻlarga shakl berdi,
Shamolni yuzaga keltirdi.
U rejalarini insonlarga ayon qiladi,
Tonggi shafaq nurini zulmatga aylantiradi,
Togʻ choʻqqilari uzra yuradi.
Parvardigori Olam — Egamizdir Uning nomi!