Ecc 1 | UznUzbL | STEP | Quyidagilar Dovud oʻgʻli, Quddusda hukmronlik qilgan Voizning soʻzlaridir.

‏ Ecclesiastes 1

Hayot behudadir

1 Quyidagilar Dovud oʻgʻli, Quddusda hukmronlik qilgan Voizning ^{▼▼ Voiz — ibroniycha matnda Qohelet (shu bobning 2, 11, 12–oyatlarida ham bor). Baʼzilar bu ibroniycha soʻzni atoqli ot deb aytadilar, ammo bu soʻz jamoa yetakchisi yoki notiq lavozimini bildirishi ham mumkin. Mazkur kitobda ushbu soʻz nihoyatda donishmand, donolik haqida koʻp hikmatlar yiqqan va ularni oʻrganib chiqqan kishiga nisbatan ishlatilgan (yana “Kirish”dagi izohga qarang). Keng tarqalgan qarashlarga koʻra, Voiz shoh Sulaymondir.} soʻzlaridir.

2 “Behuda! ^{▼▼ Behuda — ibroniycha matnda hevl, soʻzma–soʻz tarjimasi nafas (shu bobning 14–oyatida ham bor). Bu taqlidiy soʻz boʻlib, nafas chiqarganda hosil boʻladigan tovushga oʻxshaydi. Bu soʻz mana shu kitobda maʼnisiz tuyulgan yoki inson aqli yetmaydigan, ishonchsiz, oʻtkinchi narsalarga va hodisalarga nisbatan ishlatilgan.} Behuda!
— deydi Voiz. —
Hammasi behudadir!”

3 Odam bu dunyoda qilgan mehnatidan
Qanday foyda topar?
4 Avlod kelib, avlod ketar,
Bu dunyo esa shundayligicha qolaverar.
5 Quyosh chiqib yana botar,
Chiqqan joyiga qaytishga shoshar.
6 Shamol janubga esar,
Shimol tarafga yelar,
Takror–takror aylanib,
Oʻz yoʻlidan yuraverar.
7 Barcha daryolar dengizga oqar,
Dengiz esa hech toʻlmas,
Shunda ham oʻz makoni sari
Oqaverar daryolar.
8 Hamma narsa charchatar, holdan toydirar,
Ularni tasvirlashga soʻzlar ham yetmas.
Koʻzlarimiz koʻraverar, ammo toʻymas,
Quloqlarimiz eshitaverar, ammo qoniqmas.
9 Oldin nima boʻlgan boʻlsa, yana sodir boʻlgay,
Nima qilingan boʻlsa, yana qaytarilgay,
Bu dunyoda hech qanday yangi narsa yoʻq.

10 Biror narsa bormidiki, biz bu haqda: “Qaranglar, bu yangilik–ku!” — deb ayta olsak?! U oldindan bor edi, biz tavallud topmasdan oldin ham shu yerda edi. 11 Qadimda boʻlganlar esga olinmas, hatto bundan keyin boʻladiganlar ham kelajakda eslanmas.

Voizning tajribasi

12 Men, Voiz, Isroil ustidan Quddusda shohman. 13 Oʻzimni donolik bilan izlanishga, mana shu dunyoda boʻlayotgan hamma ishlarni tushunishga bagʻishladim. Xudo insonga bergan bu ish qanday qaygʻuli–a! 14 Men bu dunyoda boʻlayotgan hamma narsani koʻrdim, qaranglar, hammasi behuda, shamolning orqasidan quvishday ekan.

15 Egri narsani toʻgʻrilab boʻlmas,
Yoʻq narsani sanab boʻlmas.

16 Oʻzimga shunday dedim: “Mana, men buyuk boʻlib, donolikda mendan oldin Quddusda hukmronlik qilganlarning hammasidan oʻzib ketdim. Koʻp donolik orttirdim, ilmu maʼrifatni yaxshilab oʻrgandim.” 17 Donolik va ilm–maʼrifatning foydasi telbalik va ahmoqlikdan ustunligini anglab yetishga oʻzimni bagʻishladim, ammo bu ham shamolning orqasidan quvishday ekanligini tushundim.

18 Qaygʻu ham ortarkan, donolik qancha koʻp boʻlsa,
Dard koʻpayar ekan gar bilim oshsa.