Eze 2 | UznUzbL | STEP | Oʻsha ovoz menga dedi: — Ey inson , oʻrningdan tur, Men sen bilan gaplashmoqchiman.

‏ Ezekiel 2

1 Oʻsha ovoz menga dedi:

— Ey inson ^{▼▼ inson — ibroniycha matnda inson oʻgʻli. Mazkur kitobda Xudo Hizqiyolga aynan shu ibora bilan murojaat qilgan. Paygʻambar ham odam zotidan ekanligini, abadiy yashamasligini, u ham Xudoning kuchiga muhtojligini koʻrsatish uchun shu ibora ishlatilgan.}, oʻrningdan tur, Men sen bilan gaplashmoqchiman.

2 Ovoz menga gapirayotganda, Ruh ichimga kirib, meni turgʻizib qoʻydi. Men gapning davomini tingladim. 3 U menga shunday dedi:

— Ey inson, Men seni itoatsiz Isroil xalqining oldiga yuboraman. Ular Menga qarshi bosh koʻtarishdi. Ularning oʻzlari ham, ota–bobolari ham shu kungacha Menga qarshi gunoh qilib kelishgan. 4 Bu xalq qaysar va oʻjardir. Men seni ularning oldiga yuboraman. Sen ularga: “Egamiz Rabbiy shunday demoqda”, deb gapirasan. 5 Bu isyonkor xalq gapingga quloq soladimi, yoʻqmi, Men ularning oldiga paygʻambarni yuborganimni bilib qoʻyishsin. 6 Sen esa, ey inson, ulardan hayiqma, ularning gaplaridan qoʻrqma. Atrofingni yantogʻu tikanaklar oʻrab olsa ham, chayonlar orasida yashasang ham qoʻrqma. Ularning gaplaridan choʻchima, ularning vajohatidan dahshatga tushma. 7 Bu isyonkor xalq senga quloq soladimi, yoʻqmi, ularga Mening gaplarimni yetkaz. 8 Sen esa, ey inson, bu isyonkor xalqqa oʻxshama. Ogʻzingni och. Men senga beradigan narsani yegin.

9 Qarasam, men tomon bir qoʻl choʻzildi. Qoʻlda bir oʻrama qogʻoz ^{▼▼ oʻrama qogʻoz — papirusdan qilingan uzun oʻralgan qogʻoz. Qadimgi paytlarda kitoblar oʻrama shaklda boʻlgan.} bor edi. 10 Qoʻl oʻramni ochib, menga koʻrsatdi. Oʻramning oldi va orqa tomonlariga marsiya, motam va qaygʻu soʻzlari yozilgan edi.