Isa 20 | UznUzbL | STEP | Ossuriya shohi Sargon oʻz lashkarboshisini Ashdod shahriga yubordi. Lashkarboshi kelib, Ashdodni qoʻlga oldi .

‏ Isaiah 20

Yalangʻoch Ishayo xalq uchun alomatdir

1 Ossuriya shohi Sargon oʻz lashkarboshisini Ashdod shahriga yubordi. Lashkarboshi kelib, Ashdodni qoʻlga oldi ^{▼▼ Ossuriya shohi Sargon…Ashdodni qoʻlga oldi — Sargon II Filistlarning bu shahrini miloddan oldingi 711 yilda bosib olgan.}. 2 Oʻsha paytda Omiz oʻgʻli Ishayoga Egamiz shunday dedi:

— Qani, egningdagi qanorni ^{▼▼ qanor — dagʻal qoramtir mato boʻlib, echki yoki tuya junidan toʻqilgan. Qanorga oʻranib olish umidsizlikni va qaygʻuli holatni ifodalaydi. Koʻpincha bu harakat Xudodan kechirim soʻrab ibodat qilish va Undan madad tilash bilan birgalikda amalga oshirilgan. Paygʻambarlarning odatdagi kiyimi ana shu matodan tikilgan boʻlishi ham mumkin (4 Shohlar 1:8, Zakariyo 13:4 ga qarang).} yech, oyoqlaringdagi choriqlaringni yech.

Ishayo aytilganlarni qildi. U yalangʻoch, yalangoyoq yuradigan boʻldi. 3 Shunda Egamiz dedi:

— Qulim Ishayo uch yil yalangʻoch, yalangoyoq yurgani Misr va Habashiston ^{▼▼ Habashiston — ibroniycha matnda Kush (11:11 ning ikkinchi izohiga qarang). Shu bobning 4, 5–oyatlarida ham bor.} qismatini bildiruvchi belgi va alomatdir. 4 Ossuriya shohi Misr asirlarini, Habashiston tutqunlarini, yoshu qarisini yalangʻoch, yalangoyoq, uyatli joylari ochiq holda haydab ketadi. Misr sharmanda boʻladi. 5 Habashistonga umid bogʻlagan, Misrdan faxrlangan xalq isnodga qoladi. 6 Oʻsha kuni qirgʻoqdagi yurtning aholisi ^{▼▼ qirgʻoqdagi yurtning aholisi — Filist xalqi nazarda tutilgan boʻlishi mumkin.} shunday deb aytadi: “Biz ishongan odamlarning ahvolini koʻrib qoʻying. Ular bizga yordam berib, Ossuriya shohining qoʻlidan qutqaradi, deb yurardik. Endi qanday qutular ekanmiz?!”