Isa 53 | UznUzbL | STEP | Bizning xabarimizga kim ishondi? Egamizning qudratli kuchi kimga ayon boʻldi?

‏ Isaiah 53

1 Bizning ^{▼▼ Biz — shu bobda Ishayo paygʻambar oʻz xalqi nomidan gapirmoqda.} xabarimizga kim ishondi?
Egamizning qudratli kuchi kimga ayon boʻldi?
2 Egamizning quli Egamiz oldida yangi koʻchatday,
Quruq tuproqdagi ildizday oʻsdi.
Bizni oʻziga jalb qiladigan
Goʻzallik, ulugʻvorlik unda yoʻq edi.
Bizni oʻziga rom etadigan
Hech bir jozibasi yoʻq edi.
3 Odamlar undan nafratlandilar, uni rad etdilar.
U qaygʻu, azob–uqubat nimaligini bilardi.
Hamma undan yuz oʻgirdi, undan hazar qildi.
Biz uni odam qatorida sanamadik.
4 Ha, dardlarimizni u oʻziga oldi,
Ogʻriqlarimizni u oʻz zimmasiga oldi.
Biz esa oʻyladik: “Uni Xudo urgan,
Alamdiyda, jabrlangan u!”
5 U esa bizning gunohlarimizni deb yarador boʻldi,
Bizning ayblarimiz tufayli ezildi.
Bizga tinchlik keltiradigan jazo unga tushdi,
Uning yaralari bizga shifo berdi.
6 Hammamiz qoʻylarday yoʻldan adashdik,
Hammamiz oʻz yoʻlimizdan ketdik.
Hammamizning ayblarimizni
Egamiz uning zimmasiga yukladi.

7 U jabr koʻrdi, oʻzi uqubat chekdi,
Ammo miq etmadi, ogʻzini ochmadi.
Boʻgʻizlanishga olib borilgan qoʻziday,
Jun qirquvchi oldida jim turgan qoʻyday
U miq etmadi, ogʻzini ochmadi.
8 Hukm bilan, kuch bilan ^{▼▼ Hukm bilan, kuch bilan… — yoki Adolatsiz hukm bilan….} olib ketildi.
Uning nasli haqida kim oʻylaydi? ^{▼▼ Uning nasli haqida kim oʻylaydi? — yoki Uning nasli orasidagi odamlardan kim uning taqdiri haqida qaygʻurdi? yoxud Uning nasli orasidagi odamlardan quyidagilarni kim tushundi?}
Tiriklar yurtidan u uloqtirildi,
Xalqimizning ^{▼▼ Xalqimiz — ibroniycha matnda Xalqim, shu bobning 1–oyati izohiga qarang.} gunohi tufayli unga zarba tushdi.
9 Garchi u yovuzlik qilmagan boʻlsa ham,
Ogʻzidan yolgʻon soʻz chiqmagan boʻlsa ham,
Unga yovuzlar qatori qabr berilgandi,
Ammo oʻlganda u boylar yoniga qoʻyildi.

10 Egamiz Oʻz qulini ezishni, azoblashni maʼqul koʻrdi.
Shunday boʻlsa ham, Egamizning quli oʻz naslini koʻradi,
Uzoq umr kechiradi,
Chunki u oʻzini gunoh uchun nazr qildi.
U orqali Egamizning xohishi bajo boʻladi.
11 Chekkan azoblarining natijasini koʻrib ^{▼▼ Chekkan azoblarining natijasini koʻrib… — ibroniycha matndan. Qumron qoʻlyozmalarida Azoblar chekkandan keyin yorugʻlik koʻrib (yaʼni u yashaydi).},
U mamnun boʻladi.
Mening solih qulim oʻz bilimi tufayli
Koʻpchilikni oqlab, ularning aybini oʻziga oladi.
12 Shu bois buyuklar qatorida unga ulush beraman ^{▼▼ …buyuklar qatorida unga ulush beraman… — 49:7, 52:15 ga qarang.},
U kuchlilar bilan oʻljalarni boʻlishadi.
Axir, u oʻzini oʻlimga tutib berdi,
Gunohkorlar qatorida sanaldi.
Koʻplarning gunohini u oʻziga oldi,
Gunohkorlar uchun vasiylik qildi.