Jos 16 | UznUzbL | STEP | Yusuf avlodlariga berilgan ulushning janubiy chegarasi Yerixo shahrining yonidagi Iordan daryosidan, Yerixo bulogʻining sharqidagi joydan boshlanadi. Keyin chegara Yerixoning oldidan oʻtib, shimoli–gʻarbdagi Yahudo adirlari orqali qirlardagi Baytil shahrigacha choʻziladi.

‏ Joshua 16

Yusuf avlodining ulushi

1 Yusuf avlodlariga ^{▼▼ Yusuf avlodlari — Yusufning ikkala oʻgʻli — Efrayim va Manashening avlodlariga ishora (14:3-4 ga qarang).} berilgan ulushning janubiy chegarasi Yerixo shahrining yonidagi Iordan daryosidan, Yerixo bulogʻining sharqidagi joydan boshlanadi. Keyin chegara Yerixoning oldidan oʻtib, shimoli–gʻarbdagi Yahudo adirlari orqali qirlardagi Baytil shahrigacha choʻziladi. 2 Keyin Baytil, yaʼni Luzdan ham oʻtib ^{▼▼ …Baytil, yaʼni Luzdan ham oʻtib… — qadimiy yunoncha tarjimadan (yana 18:13 ga qarang). Ibroniycha matnda …Baytildan Luzga oʻtib….}, Orux xalqiga tegishli boʻlgan Otroʻt–Adargacha ^{▼▼ Otroʻt–Adar — ibroniycha matnda Otroʻt. Otroʻt — Otroʻt–Adarning qisqa shakli.} boradi. 3 Chegara u yerdan gʻarbdagi Yaflet avlodining yerigacha choʻzilib, Pastki Bayt–Xoʻrongacha boradi. Keyin chegara Gezer shahrigacha borib, Oʻrta yer dengizining oldida tugaydi.

4 Yusuf avlodlari boʻlgan Manashe va Efrayim qabilalari mana shu yerlarni ulush qilib oldilar.

Efrayim qabilasiga berilgan yerlar

5 Efrayim qabilasining urugʻlariga quyidagi yerlar berildi: bu yerlarning janubiy chegarasi Otroʻt–Adarda boshlanadi–da, gʻarb tomonga, Tepadagi Bayt–Xoʻrongacha choʻzilib, 6 – 7 Oʻrta yer dengizining oldida tugaydi. Sharqiy chegarasi Mixmatitdan janub tomonga boradi, Tanat–Shiloʻ, Yonox, Otaroʻt, Naro shaharlaridan oʻtib, Iordan daryosining Yerixoga yaqin boʻlgan joyida tugaydi. 8 Shimoliy chegarasi esa Tappuxdan gʻarbga boradi. Keyin Kanax soyligi boʻylab choʻzilib, Oʻrta yer dengizida tugaydi. Mana shu yerlarni Efrayim qabilasi ulush qilib oldi.

9 Efrayim qabilasiga yana Manashe hududida joylashgan bir nechta shaharlar va ularning atrofidagi qishloqlar ham berildi. 10 Ammo Efrayim qabilasi Gezerda yashayotgan Kanʼon xalqini quvib chiqarmadi. Bu xalq bugungi kungacha ^{▼▼ bugungi kungacha — shu kitob yozilgan vaqtga ishora.} Efrayim qabilasi orasida yashaydi, lekin ular qarol boʻlib xizmat qilishga majbur qilinganlar.