Jos 3 | UznUzbL | STEP | Ertasiga tongda Yoshua butun Isroil xalqi bilan birga Shitim qarorgohidan chiqib, Iordanga yetib keldi. Daryoni kechib oʻtishdan oldin ular oʻsha yerda qarorgoh qurishdi.

‏ Joshua 3

Isroil xalqi Iordan daryosini kechib oʻtadi

1 Ertasiga tongda Yoshua butun Isroil xalqi bilan birga Shitim qarorgohidan chiqib, Iordanga yetib keldi. Daryoni kechib oʻtishdan oldin ular oʻsha yerda qarorgoh qurishdi. 2 Uch kundan keyin qabila nazoratchilari qarorgoh boʻylab yurib, 3 xalqqa shunday deyishdi: “Levi ruhoniylari Egangiz Xudoning Ahd sandigʻini koʻtarib ketayotganini koʻrganingizda yoʻlga chiqinglar. Uning orqasidan boringlar. 4 U sizga yoʻlni koʻrsatib boradi, chunki sizlar bu yoʻlni bilmaysizlar. Lekin Sandiq bilan sizlarning orangizdagi masofa taxminan ikki ming tirsak ^{▼▼ ikki ming tirsak — taxminan 900 metrga toʻgʻri keladi.} boʻlishi kerak. Orangizdagi masofa mana shundan kam boʻlmasin.” 5 Keyin Yoshua xalqqa: “Oʻzingizni poklang ^{▼▼ Oʻzingizni poklang… — diniy xizmatni lozim darajada bajarishga monelik qiladigan nopoklikdan tozalanish marosimi nazarda tutilgan.}, chunki ertaga Egamiz oramizda moʻjizalar koʻrsatadi”, — dedi. 6 Ertasiga Yoshua ruhoniylarga shunday dedi: “Ahd sandigʻini olib, xalqning oldida yuringlar.” Ruhoniylar Ahd sandigʻini koʻtarib, xalq oldida borishdi.

7 Egamiz Yoshuaga shunday dedi:

— Bugundan boshlab seni butun Isroil xalqi oldida koʻkka koʻtaraman, shunda ular Men Muso bilan boʻlganimdek, sen bilan birga ekanimni bilishadi. 8 Ahd sandigʻini koʻtarib boradigan ruhoniylarga aytasan: “Iordan daryosiga yetib borganingizdan keyin, daryoga kirib toʻxtanglar.”

9 Keyin Yoshua Isroil xalqiga shunday dedi:

— Yaqinroq kelib, Egangiz Xudoning gaplarini eshiting. 10 – 11 Mana, butun olam Rabbiysining Ahd sandigʻi oldingizda Iordan daryosidan oʻtadi ^{▼▼ …Ahd sandigʻi oldingizda Iordan daryosidan oʻtadi — Ahd sandigʻini koʻtarib borgan ruhoniylar birinchi boʻlib daryoga kirishlari kerak edi (shu bobning 13-14–oyatlariga qarang). Matnda Xudo Oʻz xalqini jangga boshlab borishiga urgʻu berilgan. Ahd sandigʻi Xudo huzurining ramzi boʻlib xizmat qilardi.}. Shunday qilib, barhayot Xudo sizlarning orangizda ekanligini, Uning Oʻzi Kanʼon, Xet, Xiv, Pariz, Girgosh, Amor va Yobus xalqlarini sizlarning oldingizdan albatta quvib yuborishini bilasizlar. 12 Endi Isroil xalqining har bir qabilasidan bittadan, jami oʻn ikkita erkakni tanlab olinglar. 13 Butun olam Rabbiysi — Egamizning Ahd sandigʻini koʻtargan ruhoniylarning oyoqlari Iordan daryosining suvlariga tegishi bilanoq oqim toʻxtab qoladi, suv bir joyda yigʻilib turadi.

14 Xalq oʻz chodirlarini yigʻib, Iordandan oʻtish uchun yoʻlga tushganda, Ahd sandigʻini koʻtargan ruhoniylar ularning oldida borar edi. 15 Hosil mavsumi ^{▼▼ Hosil mavsumi — kech bahor paytiga ishora.} boʻlgani uchun Iordan suvi qirgʻoqlaridan ham toshib oqardi. Ahd sandigʻini koʻtargan ruhoniylar Iordanga yaqinlashdilar. Ularning oyoqlari suvga tegishi bilanoq, 16 – 17 daryoning oqimi toʻxtab qoldi. Suv uzoqda joylashgan Zoraton yonidagi Adam shahri ^{▼▼ …Zoraton yonidagi Adam shahri… — Adam Yerixodan qariyb 30 kilometr shimolda, Zoraton shahri esa Adamdan qariyb 20 kilometr shimolda joylashgan.} oldida yigʻilib qoldi, Oʻlik dengizga ^{▼▼ Oʻlik dengiz — ibroniycha matnda Araba dengizi, yaʼni Tuz dengizi. Araba umumiy geografik nom boʻlib, bu oyatda Oʻlik dengiz joylashgan choʻl yerlarni bildiradi.} quyiladigan daryo suvi esa oqib ketdi, daryo oʻzani qurib qoldi. Jamiki Isroil xalqi quruq yerdan yurib, Iordandan oʻtib boʻlmaguncha, Egamizning Ahd sandigʻini koʻtargan ruhoniylar daryoning oʻrtasida, quruq yerda turishdi. Xalq daryodan oʻtib, Yerixo shahrining yonidagi yerlarga bordi.