Pro 25 | UznUzbL | STEP | Quyidagilar ham Sulaymonning hikmatlaridir. Bu hikmatlar Yahudo shohi Hizqiyoning odamlari tomonidan yozib olingan.

‏ Proverbs 25

Hizqiyo tomonidan toʻplangan Sulaymon hikmatlari

(25:1-29:27)

1 Quyidagilar ham Sulaymonning hikmatlaridir. Bu hikmatlar Yahudo shohi Hizqiyoning ^{▼▼ Yahudo shohi Hizqiyo — shoh Hizqiyo miloddan oldingi 716-687 yillarda Yahudoda, yaʼni janubiy shohlikda hukmronlik qilgan. Isroilni, yaʼni shimoliy shohlikni Ossuriya bosib olgandan keyin Yahudoda hukmronlik qilgan birinchi shoh Hizqiyo edi. U hukmronlik qilgan paytda Yahudoda katta ruhiy uygʻonish boʻlgan edi.} odamlari tomonidan yozib olingan.

2 Ishlarni sirli qilish — Xudoning shuhrati ^{▼▼ Ishlarni sirli qilish — Xudoning shuhrati… — inson Xudoning ishlarini tasavvuriga sigʻdira olmaydi. Darhaqiqat, inson zoti hamma yaratilgan narsalar ustidan Xudoning hukmronligini va nazoratini anglab yetishga ojizdir. Bu — Xudoning buyukligini va ulugʻvorligini koʻrsatadi. Yaxshi shoh esa barcha ishlarni tekshirib, ularni qoʻl ostidagilarga va xalqiga maʼlum qiladi. Bunday shoh Xudoning xizmatkori sifatida dono va adolatli hukmdor boʻlish uchun, Xudoning xohish–irodasini bilishga harakat qiladi.},
ishlarni tekshirib bilish esa shoh sharafidir.
3 Osmon baland, dengiz chuqur,
shohning yuragi ham shunday,
uni tushunish qiyin.
4 Kumushdan chiqindini olib tashla,
oʻshanda undan yaxshi idish yasaladi.
5 Fosiqni shoh oldidan chiqarib tashla,
shunda shohning taxti haqiqat bilan mustahkam boʻladi.
6 Shohning oldida oʻzingni yuqori qoʻyma,
ulugʻ odamlar turganda toʻrga chiqma.
7 Chunki oʻzing koʻrib turgan asilzodalar oldida
birov seni poygakka tushirgandan koʻra,
“Toʻrga oʻting” degani yaxshiroq.

8 Shoshilib arz qilma,
oxirida qoʻshnilarning oldida uyalib qolsang nima boʻladi?
9 Qoʻshningning oʻzi bilan gaplash,
sirni boshqalarga ochma.
10 Boʻlmasa, eshitganlar seni uyatga qoʻyadi,
noming bir umrga yomon boʻladi.

11 Oʻz oʻrnida aytilgan soʻz tilla uzukka qoʻyilgan yoqut koʻzdaydir.
12 Dononing tanbehi tinglagan quloqqa
tilla sirgʻa va oltin bezakdaydir.
13 Sadoqatli xabarchi uni yuborganlarga
jazirama oʻrim paytidagi salqin suvdaydir,
xoʻjayinining qalbini sevintiradi.
14 Qilmagan sovgʻasi bilan maqtanadigan odam
yomgʻirsiz bulut va shamol kabidir.
15 Sabr–toqat bilan gapirilsa amaldor ham koʻnadi,
muloyim soʻz toshni ham sindiradi.
16 Asal topsang, yetarlicha yegin,
ortiqchasi qayt qildiradi.
17 Qoʻshningnikiga hadeb kiraverma,
boʻlmasa sendan bezib, yomon koʻrib qoladi.
18 Oʻzgaga qarshi soxta guvohlik bergan odam
bolta, qilich, oʻtkir oʻqqa oʻxshaydi.
19 Tashvishli kunda vafosizga suyanish
singan tish va choʻloq oyoqqa ishonish kabidir.
20 Gʻamgin odam oldida qoʻshiq aytish
ayozda ust–boshini yechib tashlaganday, jarohatga sirka surtish kabidir.
21 Dushmaning och boʻlsa, ovqat ber,
chanqagan boʻlsa, suv ichir.
22 Shunda uning boshiga yonayotgan choʻgʻ yiqqanday boʻlasan,
Egamiz esa seni taqdirlaydi.
23 Shimoldan esadigan shamol jala,
gʻiybat esa gʻazab keltiradi.
24 Urishqoq xotin bilan keng uyda yashagandan koʻra,
loy tomning bir chetida yashagan yaxshiroq.
25 Uzoq yurtdan kelgan xushxabar
charchagan odamga sovuq suv kabidir.
26 Fosiqqa bosh eggan solih
loyqalangan buloq va buzilgan quduqdaydir.
27 Koʻp asal yeyish yaxshi emas,
izzattalab boʻlish ham hurmat keltirmaydi.
28 Oʻzini tuta olmaydigan odam
devorsiz vayrona shahar kabidir.