Pro 5 | UznUzbL | STEP | Oʻgʻlim , donoligimga eʼtibor ber, aql

‏ Proverbs 5

Zinoga qarshi ogohlantirish

1 Oʻgʻlim ^{▼▼ Oʻgʻlim — 1:8 izohiga qarang.}, donoligimga eʼtibor ber,
aql–idrokimga quloq sol,
2 toki fahm–farosating yoʻqolmasin,
biliming saqlansin.
3 Buzuq ayolning tilidan bol tomadi,
soʻzlari — malhamday yumshoq,
4 ammo oqibati zaharday achchiq,
xanjarday oʻtkirdir.
5 Oyoqlari oʻlim tomon yuradi,
qadamlari oʻliklar diyoriga ^{▼▼ oʻliklar diyori — ibroniycha matnda Sheoʻl. Qadimda Isroil xalqi Sheoʻlni yer ostidagi tubsiz chuqurlik, marhumlar boradigan qorongʻi joy deb tushunardi.} yetaklaydi.
6 U hayotga olib boradigan yoʻlga eʼtibor bermaydi,
yoʻllari beqaror, oʻzi buni bilmaydi.

7 Oʻgʻlim ^{▼▼ Oʻgʻlim — qadimiy yunoncha tarjimadan. Ibroniycha matnda Oʻgʻillarim.}, menga quloq sol,
soʻzlarimdan chiqma.
8 U ayoldan uzoqroq yur,
uning eshigiga yaqinlashma.
9 Boʻlmasa, oʻz obroʻyingni begonalarga,
hayotingni yovuzlarga bergan boʻlasan.
10 Boyligingdan begonalar bahramand boʻladi,
mehnat bilan topgan mol–mulking oʻzgalarning uyida boʻladi.
11 Umring oxirida,
vujudingu tanangdan asar qolmagach,
faryod qilasan.
12 Oʻshanda shunday deysan:
“Men intizom va tanqiddan qanchalik nafratlanar edim–a,
13 na ustozlarimga,
na nasihat berganlarga quloq solibman.
14 Ana oqibat, jamoa orasida
halokat qirgʻogʻiga kelib qoldim.”

15 Oʻz sardobangdagi,
oʻz qudugʻingdagi suvni ^{▼▼ …Oʻz sardobangdagi, oʻz qudugʻingdagi suvni… — qadimgi Isroilda suv juda tanqis boʻlib, quduqlar ehtiyot qilib qoʻriqlanardi. Shuning uchun har kim faqatgina oʻz qudugʻidan suv ichishi kerak edi. Xuddi shu singari har qanday erkak faqat oʻz xotini bilangina jinsiy aloqa qilishi kerak.} ichaver.
16 Buloqlaring tashqarida,
irmoqlaring koʻchada oqsinmi?!
17 Uni begonalar bilan baham koʻrma,
faqat oʻzingniki boʻlsin.
18 Bulogʻing suvlari muborak boʻlsin,
koʻz ochib koʻrganing bilan quvongin.
19 Jozibali ohu va goʻzal kiyik!
Uning ogʻushi seni qoniqtirsin,
doim uning sevgisi bilan qanoatlangin.
20 Nega endi, oʻgʻlim, begona xotinni koʻngling qoʻmsaydi?
Nimaga begona ayolning ogʻushini quchasan?
21 Insonning xatti–harakatlari
Egamizning koʻzi oldidadir.
Egamiz odamning barcha ishlarini kuzatib turadi.
22 Fosiqning ishlari uning oʻzini ushlaydi,
gunohlari uni zanjirband qiladi.
23 U ahmoqligi tufayli yoʻldan ozadi,
tarbiyasizligi dastidan oʻladi.