Psa 136 | UznUzbL | STEP | Bobildagi daryolar boʻyida oʻtirardik, Yigʻlab, u yerlarda Quddusni eslardik.

‏ Psalms 136

1 Bobildagi daryolar boʻyida oʻtirardik,
Yigʻlab, u yerlarda Quddusni ^{▼▼ Quddus — ibroniycha matnda Sion (shu sanoning 3–oyatida ham bor). 2:6 izohiga qarang.} eslardik.
2 Liralarimizni oʻsha yerdagi tollarga osib qoʻygandik.
3 Bizni u yerda asirga olganlar:
“Qoʻshiq aytib beringlar”, derdilar,
Bizga zulm qilganlar koʻngillarini chogʻ qilgani:
“Bizga Quddus qoʻshiqlaridan kuylanglar”, derdilar.

4 Qanday qilib begona yurtda
Biz Egamizga qoʻshiq kuylay olardik?!
5 Ey Quddus, agar seni unutsam,
Oʻng qoʻlim qurib qolsin.
6 Agar men seni eslamasam,
Quddusni eng katta shodligim deb bilmasam,
Tilim tanglayimga yopishib qolsin.

7 Ey Egam, Quddus qulagan kunda
Edomliklar ^{▼▼ Edomliklar — azaldan Isroil xalqiga dushman boʻlib kelgan xalq, ularning yurti Oʻlik dengizning janubida joylashgan edi. Bobilliklar Quddusni vayron qilganlarida, Edom xalqi ularga yordam bergan edi (yana Hizqiyol 35:5 va Obodiyo 10-14–oyatlarga qarang). Toʻliqroq maʼlumotga ega boʻlish uchun lugʻatdagi EDOM soʻziga qarang.} nima qilganini yodda tutgin.
Axir, ular: “Qulating, yiqiting uni!
Poydevorigacha qulatib tashlang!” deb baqirgan.

8 Ey Bobil shahri! Qirgʻinga mahkum boʻlgansan ^{▼▼ Qirgʻinga mahkum boʻlgansan — yoki Ey qotil!}.
Bizga ne qilgan boʻlsang,
Oʻshani boshingga soladiganlar baxtlidir.
9 Sening goʻdaklaringni ushlab, qoyaga urib,
Tilka–pora qiladiganlar baxtlidir.