Psa 96 | UznUzbL | STEP | Egamiz Shohdir, zamin quvonsin, Dengiz ortidagi hamma yurtlar shod boʻlsin.

‏ Psalms 96

1 Egamiz Shohdir, zamin quvonsin,
Dengiz ortidagi hamma yurtlar shod boʻlsin.
2 Bulutlar, zimziyo zulmat Uning atrofini oʻragan,
Adolatu haqiqat Uning taxtiga poydevor boʻlgan.
3 Egamiz olovini Oʻzidan oldin yuboradi,
Olovi har tarafdagi dushmanlarni yutadi.
4 Chaqmoqlari olamni yoritadi,
Zamin buni koʻrib titraydi.
5 Butun olamning Rabbiysi oldida,
Egamiz oldida togʻlar mumday eriydi.

6 Samolar eʼlon qiladi Uning adolatini,
Jamiki xalqlar koʻradi Uning ulugʻvorligini.
7 Butlarga sajda qiluvchilar,
Behuda sanamlari ila maqtanuvchilar
Sharmanda boʻladi.
Barcha xudolar Egamizga taʼzim qiladi.

8 Ey Egam! Sening adolatingdan
Yahudo shaharlari shod boʻladi,
Quddus ^{▼▼ Quddus — ibroniycha matnda Sion. 2:6 izohiga qarang.} eshitib, quvonadi.
9 Ey Egam, yer yuzidagi buyuk hukmdor Sensan,
Hamma xudolardan Sen yuksalgansan.

10 Ey Egamizni sevganlar!
Yomonlikdan nafratlaning.
U taqvodorlarining jonlarini Oʻzi asraydi,
Fosiqlarning qoʻlidan ularni xalos etadi.
11 Solihlarga nur sochilgay,
Yuragi poklar uzra shodlik yoyilgay.
12 Ey solihlar, Egamiz tufayli shodlaning,
Uning muqaddas nomini olqishlang!