Rev 13 | UznUzbL | STEP | Ajdarho dengizning qum sohiliga borib turdi . Toʻsatdan men dengizdan bir maxluq chiqib kelganini koʻrdim. Uning yettita boshi va oʻnta shoxi bor edi. Har bir shoxiga bittadan toj kiydirilgan, har bir boshiga esa kufrona nom yozilgandi.

‏ Revelation of John 13

Dengizdan chiqqan maxluq

1 Ajdarho dengizning qum sohiliga borib turdi ^{▼▼ Ajdarho…turdi — yunoncha matndan. Baʼzi yunon qoʻlyozmalarida Men…turdim.}.

Toʻsatdan men dengizdan bir maxluq chiqib kelganini koʻrdim. Uning yettita boshi va oʻnta shoxi bor edi. Har bir shoxiga bittadan toj kiydirilgan, har bir boshiga esa kufrona nom yozilgandi. 2 Men koʻrgan bu maxluq qoplonga oʻxshardi. Oyoqlari ayiqning oyogʻiga, ogʻzi esa sherning ogʻziga oʻxshar edi. Ajdarho bu maxluqqa oʻz qudrati, taxti va buyuk hokimiyatini berdi. 3 Maxluqning boshlaridan biri davolab boʻlmaydigan darajada qattiq yaralangan edi. Ammo uning bu yarasi sogʻayib qoldi. Shunda butun jahon hayratda qolib, maxluqqa ergashdi. Odamlar ajdarhoga sajda qilishdi, chunki ajdarho maxluqqa oʻz hokimiyatini berdi. 4 Ular maxluqqa ham sajda qilib, shunday deb aytishardi: “Kim ham bu maxluqqa teng kelardi?! Kim ham unga qarshi chiqa olardi?!”

5 Maxluqqa takabburona va kufrona soʻzlar aytadigan ogʻiz berildi. Unga qirq ikki oy davomida hukmronlik qilish huquqi berildi. 6 Maxluq kufr ketib, Xudoni va Xudoning nomini laʼnatladi. U Xudo yashaydigan makonga va samoda yashaydigan har bir mavjudotga laʼnatlar yogʻdirdi. 7 Unga Xudoning azizlariga qarshi jang qilish va ularni yengish uchun izn berildi. Unga har bir qabila, elat, millat va xalq ustidan hokimiyat berildi.

8 Bu dunyoga qarashli odamlarning hammasi maxluqqa sajda qilishadi. Ularning ismlari boʻgʻizlangan Qoʻzining hayot kitobiga ^{▼▼ hayot kitobi — 3:5 izohiga qarang.} dunyo yaratilishidan oldin yozilmagan ^{▼▼ Ularning ismlari…dunyo yaratilishidan oldin yozilmagan — yoki Bu odamlarning ismlari dunyo yaratilishidan oldin boʻgʻizlangan Qoʻzining hayot kitobiga yozilmagan. Ammo 17:8 oyatda bu odamlarning ismlari “dunyo yaratilishidan oldin hayot kitobiga yozilmagan” deb aytiladi. Shuning uchun ushbu oyatda 17:8 oyatga mos keladigan maʼno berilgan.}.

9 Kimning eshitar qulogʻi boʻlsa, eshitsin!
10 Hamma peshanasidagini koʻradi:
Baʼzilar asirlikka tushib, surgunga ketadi.
Baʼzilar qilichdan oʻtkaziladi ^{▼▼ Baʼzilar…qilichdan oʻtkaziladi — yunoncha matndan. Baʼzi yunon qoʻlyozmalarida Kimki boshqalarni asirlikka olsa, oʻzi asirlikka tushar. Kimki qilichdan oʻtkazsa, oʻzi qilichdan oʻtkazilar.},
Bu vaziyat Xudo azizlaridan sabr–toqatu imonni talab qiladi.

Yerdan chiqqan maxluq

11 Bundan soʻng men yerdan chiqayotgan boshqa bir maxluqni koʻrdim. Uning ikki shoxi qoʻchqorning shoxlariga oʻxshardi, u ajdarhoday gapirardi. 12 U birinchi maxluqqa xizmat qilib, uning butun hokimiyatini ishga solardi. Butun yer yuzi va u yerda yashaganlar yarasi tuzalgan birinchi maxluqqa sajda qilsin deb, ularni majburlardi. 13 Bu ikkinchi maxluq buyuk va moʻjizali alomatlar koʻrsatdi. U hatto hammaning koʻzi oldida osmondan yerga olov tushirdi. 14 Birinchi maxluqning nomidan bu moʻjizali alomatlarni koʻrsatishga unga izn berilgandi. Bu alomatlari bilan u yer yuzidagi odamlarni yoʻldan ozdirdi. U odamlarga: “Qilichdan yaralangan, ammo sogʻ qolgan maxluqning tasvirini yasanglar”, — deb buyurdi. 15 Unga maxluqning tasviriga jon ato etish qudrati berilgandi. Maxluq tasviri tilga kirdi va oʻziga sajda qilmaganlarning hammasini oʻldirtirdi. 16 U hammani — kattayu kichikni, boyu kambagʻalni, qulu erkin odamni majburlab, ularning oʻng qoʻli yoki peshanasiga tamgʻa bostirdi. 17 Kimda maxluqning tamgʻasi boʻlmasa, u mutlaqo oldi–sotdi qilolmasdi. Tamgʻada maxluqning nomi yoki nomining soni yozilardi.

18 Bunda hikmat bor. Aqli yetgan odam maxluqning sonini hisoblab chiqsin, chunki bu son — maʼlum bir insonni bildiradigan sondir. Uning soni 666 ^{▼▼ Uning soni 666 — maxluqning nomini ifodalaydigan sonlar qoʻshilganda mana shu son kelib chiqsa kerak. Ibroniy va yunon alifbesining har bir harfi maʼlum bir sonni ifodalaydi. 6 soni muvaffaqiyatsizlik, qusur va yovuzlik timsoli edi (barkamollik timsoli boʻlgan 7 sonidan bitta kam). Uchta 6 sonining yonma–yon kelishi muvaffaqiyatsizlik, qusur va yovuzlik maʼnosini gʻoyat kuchaytiradi.}.