Song 3 | UznUzbL | STEP | Kechqurun oʻrnimda yotganimda, Butun qalbim bilan sevgan oshigʻimni qoʻmsadim. Juda qoʻmsadim, lekin uni topolmadim.

‏ Song of Solomon 3

Qiz: 1 Kechqurun oʻrnimda yotganimda,
Butun qalbim bilan sevgan oshigʻimni qoʻmsadim.
Juda qoʻmsadim, lekin uni topolmadim.
2 Endi turib, shaharga chiqaman.
Shahar maydonlariyu koʻchalarida yurib,
Sevgilimni izlayman.
Izladim–u, ammo uni topolmadim.
3 Qoʻriqchilar shaharni kezib yurib,
Meni koʻrib qolishdi.
Ulardan: “Sevgilimni koʻrmadingizmi?” deb soʻradim.
4 Ularning oldidan ketishim bilanoq,
Sevgilimni topdim.
Uni mahkam quchib, qoʻyib yubormadim.
Onamning uyiga olib keldim.
Uni oʻz tuqqan onamning xonasiga olib kirdim.
5 Ey Quddus qizlari,
Kiyigu yovvoyi ohular ^{▼▼ Kiyigu yovvoyi ohular — 2:7 izohiga qarang.} haqi ont iching.
Vaqt–soati kelmaguncha,
Sevgini qoʻzgʻatmang, uygʻotmang.

Uchinchi qoʻshiq

Quddus qizlari: 6 Dashtda tutunday koʻtarilib,
Koʻrinayotgan narsa nimadir?
Undan attor rastasidagi barcha xushboʻy atirlarning hidi,
Mirra ^{▼▼ Mirra — 1:12 izohiga qarang.} va xushboʻy tutatqilarning hidi kelib turibdi.
7 Qaranglar, u Sulaymonning taxtiravonidir ^{▼▼ taxtiravon — shoh, malika va oliy martabali kishilarni oʻtqazib, yelkada koʻtarib olib yurish uchun uzun dastalar ustiga oʻrnatilgan hashamdor oʻrindiq.},
Uning atrofida oltmishta pahlavoni bor.
Ular Isroil xalqi orasidagi eng bahodir jangchilardir.
8 Qilich oʻynatishda hammasi mohir,
Jangda ham juda mahoratlidirlar.
Tunda boʻladigan hujumlardan saqlanish uchun
Ularning hammasi qilich bilan qurollangan.
9 Shoh Sulaymon oʻz taxtiravonini
Lubnon yogʻochlaridan yasattirgan.
10 Bu taxtiravon dastalari kumushdan,
Orqasi tilladan yasalgan,
Oʻrindigʻiga esa safsar kimxob ^{▼▼ kimxob — oʻrishi ipak, arqogʻi zardan toʻqilgan mato.} toʻshalgan.
Quddus qizlari taxtiravonning ichini
Muhabbat bilan bezatganlar.
11 Chiqinglar, ey Sion qizlari!
Shoh Sulaymonga qaranglar.
Toʻyi kuni, yuragi shodlik bilan toʻlgan kuni
Onasi kiydirgan tojga qaranglar.