Song 7 | UznUzbL | STEP | Qaytgin, qaytib kelgin, ey Shulamlik qiz! Qaytib kel, seni yana bir bor koʻraylik. Yigit: Nima uchun bu Shulamlik qizga qaraysizlar?! U ikki qator qizlar orasida raqsga tushyaptimi?!

‏ Song of Solomon 7

Quddus qizlari: 1 Qaytgin, qaytib kelgin, ey Shulamlik ^{▼▼ Shulamlik — Shulam nomaʼlum bir joy yoki komil maʼnosini bildiradigan bir soʻz ham boʻlishi mumkin.} qiz!
Qaytib kel, seni yana bir bor koʻraylik.
Yigit: Nima uchun bu Shulamlik qizga qaraysizlar?!
U ikki qator qizlar orasida raqsga tushyaptimi?!
2 Ey malikaga oʻxshagan qiz!
Kafsh kiygan oyoqlaring qanday chiroyli!
Doʻmboq sonlaring javohirlarday,
Xuddi mohir ustaning qoʻli bilan ishlanganday!
3 Doimo xushboʻy sharobga toʻla boʻlgan,
Dum–dumaloq kosadaydir sening kindiging.
Yumaloq qorning esa nilufarlar bilan oʻralgan,
Tillarang bugʻdoy uyumi kabidir.
4 Koʻkraklaring egizak kiyiklardaydir.
5 Fil suyagidan qurilgan minoraday goʻzaldir boʻyning,
Batrabim darvozasi yonidagi
Xashbon ^{▼▼ Xashbon — Amor shohi Sixoʻn hukmronligi davrida bu shahar poytaxt boʻlgan (Sahroda 21:26 ga qarang). Bu shahar Iordan daryosining sharq tomonida joylashgan edi. Buloqlar koʻpligidan u yerda suv doim moʻl–koʻl edi.} buloqlariday yorqindir koʻzlaring.
Burning esa Damashq shahriga qaragan
Lubnon minorasiday tekisdir.
6 Boshing Karmil togʻiday ^{▼▼ Karmil togʻi — Isroildagi eng baland togʻlardan biri. Bu togʻ unumdorligi va goʻzal tabiati bilan mashhur edi.} baland turadi,
Soching kimxobday goʻzal,
Hatto shoh ham unga asirdir.

7 Qanday goʻzal va xushroʻysan,
Huzurbaxsh sevgilim mening.
8 Palma daraxtiday savlatlisan,
Koʻkraklaring uning mevalariday toʻliqdir.
9 Men shunday dedim: “Palma daraxtiga chiqib,
Mevalaridan ushlayman.”
Koʻkraklaring men uchun uzumday mazali,
Nafasing esa olmalarday shirin boʻlsin.
10 Oʻpichlaring eng aʼlo sharobday shirindir,
Bunday sharob lab va tishlar orasidan tekis oʻtadi ^{▼▼ …lab va tishlar orasidan tekis oʻtadi — qadimiy yunoncha, suryoniycha va lotincha tarjimalardan. Ibroniycha matnda …uxlayotganlarning lablari ustidan mayingina oʻtadi.}.
Qiz: 11 Men sevgilimnikiman,
U faqat meni qoʻmsaydi.
12 Kelgin, sevgilim, dalalarga boraylik.
Xina gullari orasida ^{▼▼ Xina gullari orasida… — yoki Qishloqlar orasida….} yotib qolaylik.
13 Vaqtli turib, uzumzorlarga kiraylik.
Ular gulga kirdimikin?!
Toklaru anorlar gullaganmikin?!
Oʻsha yerda men senga oʻz sevgimni toʻla koʻrsataman.
14 Mehrigiyolar ^{▼▼ Mehrigiyolar — qadimda odamlar, bu oʻsimlikning mevalari jinsiy xohishni kuchaytirib, ayolning homilador boʻlishiga imkoniyat yaratadi, deb ishonishardi.} hid taratib turibdi.
Eshigimiz tepasiga har xil mevalardan osib,
Sen uchun saqlab qoʻydim, sevgilim.