Luk 4 | WumSC | STEP | Zezu, ayinga nzali ye Yuden. Singa ye Fudzu ye Umpene yedze nedzi, Fudzu ye Umpene ya bapa wangu se ikanye.

‏ Luke 4

IMAAMA DZE ZEZU

1 Zezu, ayinga nzali ye Yuden. Singa ye Fudzu ye Umpene yedze nedzi, Fudzu ye Umpene ya bapa wangu se ikanye. 2 Awawu ye Satan emaama Zezu se masi meku menayi. Se masi mamu mesi wangu akuta utsulu ve nzala, ye mana nzala ya kwata wangu. 3 Satan nedzi ati: «Ti wedzi ni nwana we Nzambi, tanda ne imanya dzi dze yikwene bila.» 4 Zezu nedzi ati: «Batende se sangunvu ye Umpene.» Ati: «Mutu nde lunga ne bila bitu.» 5 Yumana vavu, ye Satan ebapa Zezu ikulu ne ulaka wangu melongo mesi. 6 Wangu nedzi ati: «Weni wami itse kaba ukani, ne untanvu nwen melongo mesi, byangu byesi ni byami, metuka kaba ne wami itondo. 7 Ti wavuna mebongo busu vami ne ubondo me, metse kabe we bibyesi.» 8 Zezu nedzi ati: «Batende se sangunvu ye Umpene.» Ati: «Wowe itse bondo si Kunwu Nzambi ne upika dzandza dzedzi mene.» 9 Ye Satan ebapa Zezu Zeluzaleme, yedzi esatse wangu kule nwanza nwen ndaku ye Nzambi nedzi ati: «Ti wedzi ni nwana we Nzambi, padzime sina.» 10 Ni batende se sangunvu ye Umpene ati: «Utsina nowe Nzambi aluma betuma bedzi ne ubata we.» 11 Bangu betse supa we se meboko me bangu toko mekulu mowe makula memanya. 12 Zezu nedzi ati: «Batende se sangunvu ye Umpene.» Ati: «Wende maama Kunwu Nzambi wowe.» 13 Satan amana maama Zezu se misunvu myesi, yedzi etse ulayi nedzi ndzii ne ndili ye Nzambi etanda.

Zezu abanda dzandza dzedzi Galile

14 Fudzu ye Umpene ye mana lundise Zezu, yedzi evutse Galile. Batu bedze ne uyuka likuma ledzi se bingundu bye nongo ne Galile. 15 Wangu edze ne lakise iwowe dze Nzambi se mendaku me umbondu, batu besi bedze ne kakise wangu.

Batu balewe Zezu Nazaleti

16 Zezu atse Nazaleti ngundu yedzi enene. Vusa ve idzundu Zezu anyindzile se ndaku ye umbondu, yangu niku yedzi, ye utelime ne untangale sangunvu ye Umpene. 17 Ye bekaba wangu sangunvu ye Ezayi Mutu we Nzambi. Zezu adzuvile sangunvu, ayene buma ye batende ati: 18 «Fudzu ye Kunwu yedzi kule yami.»
Wangu ni we metobo me,
ne utanda be unkuna unsisili unve,
wangu ni we meluma me
ne utanda ne bidzi mingenenge ati, Bangu baya ni nyengele,
ne utanda ne be misa pii ati, bangu betuka yene,
ne utanda ne be binyokile ati, bangu baya ne singa.
19 Ne utanda ne batu
ayi ni ndili ye beyi bitse yene itondo dze Kunwu.

20 Zezu adzuba Sangunvu, avutise Sangunvu ne undzandzi, asunda untsitsi, batu besi bedze se ndaku ye umbondu bedze ne misa kule yedzi. 21 Zezu ne bangu ati: «Me beyi beme yuka me tangala se Sangunvu ye Umpene, mayikwe lolo unbu.» 22 Batu besi bayene wangu uve, bakima ne manvu meve medze ne pula se undzunvu nwedzi, ni mutu yu, ka nwana we Zozefi. 23 Zezu ne bangu ati: «Meyiba miti beyi befumba te me ngana ye unsaki, saka we, we mene, beyi betandele me ati, besu bayuka mowe mepika se ngundu ye kapenayume, pika mangu motu se ngundu yowe mene.» 24 Zezu avele tanda ne bangu ati: «Metanda beyi ni unbu amene, Mutu we Nzambi, batu nde mekidze wangu se ngundu yedzi mene.» 25 Metanda beyi ni unbu, ndili ye Eli Mutu we Nzambi, se ilongo dze Izayeli yedze ne mikwili miyitsi. Ndili mene yangu mbotu, badze bisiwu bisatu ne liyi, nvula nde no, ne pinga ya kwa se ilongo dzesi dze Izayeli. 26 Ni Nzambi eke luma Eli kwele ye unkwili nwen Izayeli, wangu eluma Eli ni kwele ye unkwili nwen ngundu ye Salepeta se ilongo dze Sidone. 27 Ndili ye Elizi Mutu we Nzambi, yedze ne batu bedze ne bifima se Izayeli, ni Elizi eke lungise mutu tine motu se Izayeli, ni Elizi alungise Naama we ilongo dze Sili. 28 Ye batu besi beyuka me Zezu edze ne utanda se ndaku ye umbondu, ye bangu besi bekanve nedzi. 29 Bangu batelime, bapanza Zezu se ngundu, babapa wangu se kudzi ye bangu betunga ngundu, bangu bafumba linda wangu. 30 Ni Zezu asuta tima ye bangu, yedzi etse.

Zezu asaka mutu wedzi ne umbiti

31 Zezu atse Kapenayum ngundu ye Galile vusa ve idzundu, Zezu alakise batu. 32 Bangu besi bakima nda wangu edze ne ulakise, ni Zezu edze ne wowe ne singa ye Nzambi ekaba wangu. 33 Se ndaku ye umbondu, yedze ne mutu motu wedze ne umbiti, wangu awula unsima ne singa ati: 34 «We Zezu we Nazaleti, yowe ifumba ne besu niyi? We meya ni ne utsala singa ye besu? Meyibe we, weni umpene nwen Nzambi me luma.» 35 Zezu ne umbiti ati: «Dzuba undzunvu, pula.» Ye umbiti nwen nawunle mutu mene busu ve batu besi, ye nwangu nwen pula, mutu mene eke yukuve mbonzi. 36 Batu besi bakima, bawowe tima ye bangu ati: «Ami miwowili ni minza? Apanza mimbiti ye myangu mipula.» 37 Ye batu besi bewowe ne kunvu ye Zezu se ilongo dzesi.

Zezu asaka mibedzu miyitsi

38 Zezu apula ndaku ye umbondu, atse ndaku ye Simon, akobise utsulu ve Simon ve saba ne unwaku nwen singa. Batu basunwunle Zezu ne usaka wangu. 39 Zezu adondime kule yedzi, akanve ne unwaku ye unwaku nwen siya, ye utsulu ve Simon ve telime ne ukaba bangu bila. 40 Ne ikolo batu bedze ne mebedzu mesi, babapa bangu kwele ye Zezu, yedzi esatse bangu meboko, ye mibedzu myesi mye lunga. 41 Ne mimbiti miyitsi mya pula se batu ne uwula misima ati: «Weni nwana we Nzambi.» Ni Zezu abanwunle bangu asumba bangu ne uwowe, ne bangu beyiba ati, wangu ni we Nzambi etobo.

Zezu alakise se mendaku me umbondu

42 Vusa ve senwen, Zezu apula se ngundu, atse se buma ye ikanye. Batu batse ne fumba Zezu, bakobise wangu, basumba Zezu ati: «Wende tse.» 43 Ni Zezu ne bangu ati: «Uve matse ne tanda misisili mive mye likuma le Nzambi se bingundu byoko, Nzambi ameluma me utsina ne vavu.» 44 Ye Zezu etse ne tanda misisili mive se mendaku me umbondu me Zude.