1Ti 3 | XalIBTNT | STEP

‏ 1 Timothy 3

Иткдг улсин һардачин заңгин тускар

1 – 2 – 3 Иткдг улс һардхар седҗәх күн бәәхлә, тер буйнта көдлмш кехәр седҗәнә. Иткдг улсин һардач күн иим болх йоста: әмтнәс келүлшго, һанцхн гергтә ^{▼▼Һанцхн гергтә, эс гихлә, нег дәкҗ гер авх.}, чаһр ууҗ согтшго, бийән сәәнәр бәрдг, олн дунд күндтә, әмтиг гиичлүлхдән дурта, арһта багш, чаһрт авлгддго, ноолдач биш номһн заңгта, эвтә болн мөңгнд дурлшго күн болх. 4 Тер күн эврәннь өрк-бүлән сәәнәр һардҗ чаддг болх зөвтә. Үрдүднь терүг бас тевчәд, соңсхврта болх йоста. 5 Кемр кен чигн күн эврәннь өрк-бүлән эс һардҗ чадҗахла, тер күн яһҗ Бурхнд иткдг улсиг һардхмб? 6 Һардх күүг шиңкән Бурхнд итксн улсас шүүҗ авхмн биш. Тиим күн ик сана зүүдг болдг. Тиигхләрн тер эрлглә әдл засггдх. 7 Һардх күн олн дунд тоомсрта болх йоста. Эс тиигхлә тер күн һутагдҗ, эрлгин хавхд бәргдх.

Иткдг улсин нөкднрин заңгин тускар

8 Иткдг улсин нөкднр бас тиим болх йоста: сән заңгта, үннч, чаһрт авлгддго, мөңгнд хармч биш болх. 9 Тедн сүзгин медүлсн үннд цевр седкләрн иткх йоста. 10 Түрүләд тиим улсиг сөрәд хәләх кергтә. Кемр тедн эн шүүвр даахла, тиигәд одҗ иткдг улсин нөкдин көдлмш кеҗ чадхмн. 11 Нөкднрин гергчүд ^{▼▼Оңгданар болхла, нөкд болҗах гергчүд.} бас сән заңгта, хов зөөшго, чаһр ууҗ согтшго, цугтад ицлтә бәәдг болх зөвтә. 12 Нөкднр һанцхн гергтә ^{▼▼Һанцхн гергтә, эс гихлә, нег дәкҗ гер авх.} болх зөвтә. Эврәннь өрк-бүлән болн үрдүдән сәәнәр һардҗ чаддг болх йоста. 13 Нөкднр эврәннь көдлмшән сәәнәр күцәхлә, тедниг талдан иткдг улс өөдән үнлх. Тедн Исус Христост итклиннь тускар зөргтәһәр келх.

Христианск сүзгин алдр нууц

14 – 15 Би удл уга танад күрхв гиҗ нәәлҗәнәв. Кемр намаг удадхла, эн бичг Бурхна өрк-бүлд бийән яһҗ бәрхиг зааҗ өгх. Бурхна өрк-бүл әмд Бурхнд иткдг улс мөн. Иткдг улс болхла үннә ул болн хаац болҗана. 16 ^aМана шаҗна нуувч ик алдр: Исус Христос күн болад төрсмн. ^bӘрүн Сәкүсн терүг чик седклтә гиҗ үзүлв. Терүг Бурхна элчнр цугтан үзлә. Түүнә тускар олн улс дунд цәәлһвр кегдв. Христос туурмҗтаһар теңгрүр авгдла. Терүнд делкән олн улс иткв.