1Ti 5 | XalIBTNT | STEP | Медәтә күүнд шүрүһәр бичә үг кел. Теднлә эврәннь эцктәһән әдл бә. Баһчудла дүүнртәһән әдл бол.

‏ 1 Timothy 5

1 Медәтә күүнд шүрүһәр бичә үг кел. Теднлә эврәннь эцктәһән әдл бә. Баһчудла дүүнртәһән әдл бол. 2 Медәтә күүкд күүнлә экләһән әдл бә. Баахн наста күүкдлә эврәннь эгч-дүүнрлә әдл бол. Альк халхарн теднлә чигн бийән цеврәр бәр.

Иткдг белвсн гергчүдин тускар

3 – 4 Түрҗәх белвсн улст эдлврәр килмҗән тусха. Кемр белвсн күүнд үрн бәәхлә, эс гихлә ачнр-зеенр бәәхлә, тедн иткдг улсин даалһврар өрк-бүлдән килмҗән өгәд асрх. Тер килмҗәрн тедн өвкнртән ачинь хәрүлх. Бурхн тиигхәр седҗәнә. 5 Йосндан һанц белвсн күүкд күн Бурхнд нәәләд, өдр-сө уга дөң сурад зальврна. 6 Кемр белвсн күүкд күн аля җирһләр бәәхлә, тер әмд болв чигн Бурхнд шүтлһәрн үкҗ одҗ. 7 Хөөннь кү гемшәдгон төләд чи энүнә тускар иткдг улст цәәлһәд келҗә. 8 Эврәннь төрл-садан, терүнәс үлү өрк-бүлән эс асрҗах күн иткләсн хольҗад, йосндан болхла, иткдго күүнәс дор болҗана. 9 – 10 Иткдг улсин теткврт җир күрсн болн нег дәкҗ мордсн ^{▼▼Оңгданар болхла, залудан итклтә болсн.} белвсн күүг авхмн болҗана. Тер күн эврән сән йовдл һарһсарн темдгтә болх йоста: үрдән өскх, гиичлүлҗ чаддг, эврәннь герт орҗ ирсн иткдг күүнә көл уһах ^{▼▼Көл уһах – тер цагт ялч күн герт орҗ ирсн улсин көләс хаалһин тоорм уһаҗ цеврлх йоста бәәсмн.}, күнд-түрүлә харһсн улст дөңгән күргх, цаарандан чигн сән йовдл һарһҗ йовх күн болх зөвтә. 11 Җирн нас күрәд уга белвсн күүкд улсиг тер тоод бичә орул. Яһад гихлә, кемр әмд күүнә седвәрнь диилхлә, дәкн тедн мордхар седнә. Тер бәәдләрн тедн Исус Христосас холдҗана. 12 – 13 Тиигәд тедн Христост өгсн үгән эвдсндән Бурхнас засглгдна: терүнәс оңданар болхла, тедн цаган хара давулдг дасна. Тедн гермүд эргнә, хов зөөнә, күүнә кергт орлдна, келгдшго юм келнә. 14 Тиигәд би баахн наста белвсн күүкд улст күүнд одтха гиҗ селвг өгчәнәв. Тедн үр һарһад, гериннь эдл-ахуһан бүтәһәд, хортнасн му келүллго бәәтхә гиҗәнәв. 15 Яһад гихлә, зәрм күүкд улс эврән итклән хаяд, эрлгиг дахлдв. 16 Кемр Христост иткдг гергчүдт белвсн төрл-садн бәәхлә, тедндән килмҗән күргх йоста. Бийинь килмҗән тедн иткдг улсин багд даалһх йосн уга. Иткдг улсин баг болхла, йосндан төрл-садн уга, белвсн күүнд дөңгән күргх зөвтә.

Иткдг улсин ахлачнрин тускар

17 Сәәнәр көдлмшән кеҗәх иткдг улсин ахлачнрт хойр дам җалв өгх кергтә. Түүнәс үлү цәәлһврин көдлмш кедг болн сурһдг ахлачнрт бас тиим мөңг өгхмн.

18 Бурхна Бичгт иигҗ бичәтә бәәнә: «Буудя цокҗах царин ам бичә бо», эс гихлә «Көдлҗәх күн эврәннь ачлвран авх йоста». 19 Иткдг улсин ахлачнрт хойр-һурвн күн герч эс болтл гемшәхәр седсиг бичә соңс. 20 Килнц һарһҗах ахлачнриг илднь олна нүүрт кел. Тиигхлә талдан улс килнц һарһхасн әәх. 21 Бурхна, Исус Христосин, шүүҗ авсн Бурхна элчнрин нүүрт чамаг би эн зааврмуд авад, чирә хәләлго, нег чигн күүг йилһлго дураһад күцә гиҗ закҗанав. 22 Деед Эзнә көдлмш күцәх кү шүүҗ авхин төлә бичә адһҗ терүн деер һаран тәв. Бас күүнә килнцд бичә орлц. Бийән цеврәр бәр. 23 Цаарандан һанцхн ус биш, эврәннь геснә төлә болн эрүл-мендин төлә невчкн чаһр ууҗа. 24 Зәрм күүнә килнц иләр үзгднә. Тиигәд тедниг Бурхн засглҗана. Зәрминнь килнц хөөннь одҗ медгднә. 25 Түүшң сән керг бас иләр үзгднә. Зәрм сән керг хөөннь медгднә.