2 Thessalonians 3
Мана төлә зальвртн
1Ахнр-дүүнр, аш сүүлднь, мана төлә зальвртн. Деед Эзнә үг цаарандан чигн шулун тарад, тадн дунд туурсн әдләр тууртха гиҗ зальвртн. 2Таарш уга болн хорта улсас мадниг сулдххин төлә зальвртн. Сән Зәңгд зәрмнь иткхш. 3Деед Эзнд нәәлҗ болҗана. Тер таниг батраһад, эрлгәс харсҗ авх. 4Деед Эзн мадниг таднд иткүлҗ, мана закҗасиг цугинь күцәһәд, цааранднь чигн күцәхит гиҗ ицҗәнәвидн. 5Деед Эзн таднд Бурхна дур болн Христосин теслт күртәтхә гиҗ би зальврҗанав.Көдлмш кех кергтә
6Деед Эзн Исус Христосин нерн деерәс, ахнр-дүүнр, бидн таднд иигҗ закҗанавидн: залху болн мана өгсн номар эс бәәх күүнлә бичә үүрлтн. 7Маднас үлгүр авад яһҗ бәәхинь тадн эврән меднәт. Танад бәәхдән бидн залхурҗ цаган давулсн угавидн. 8Күүнә мөңг-эдлврәр бас бәәсн угавидн. Бидн күүнд ацан болшгоһар седәд, нам өдр сө уга шунҗ көдлвидн. 9Бидн таднас күццднь дөң авч чадх бийнь, таднд үлгүр үзүлхәр тиигҗ бәәләвидн. 10Танад бәәхдән бидн «эс көдлхәр седсн күүнд, хот бичә өгтн» гиҗ келдг биләвидн. 11Болв тадн дунд бәәх зәрм залху улс мел көдлхәр седхш. Тедн күүнә кергт орлцна! 12Деед Эзн Исус Христосин нерн деерәс тиим улсиг бидн чиктән бәәһәд, эврәннь теткврин мөңг экләд олтн гиҗ закад, өмнәснь хөрҗәнәвидн. 13Тадн болхла, ахнр-дүүнр, цуцрлт угаһар әмтнд сә кеҗ йовтн. 14Эн бичгт өгчәх заквр эс авчах улст шишлң оньган өгцхәтн. Эврәннь бәәдләс ичдгәр, тиим күүнлә бичә үүрлтн. 15Зуг тиим күүг эврәннь дәәсн гиҗ бичә тоолтн. Терүг эврәннь дүүлә әдл хөртн.Ашлгч үгмүд
16Мана Эвин булг – Деед Эзн танд төвкнүн бәәдл кезә чигн юунд болвчн учратха. Деед Эзн таднла оньдин бәәтхә! 17«Павелас менд!» бичг болһнаннь чилгчәр би һаран тәвҗәнәв. 18Деед Эзн Исус Христос таниг цугтаһитн хәәрлтхә!
Copyright information for
XalIBTNT