2Ti 2 | XalIBTNT | STEP | Көвүн минь, Христос Исусин өгчәх хәәрлт чамаг батратха!

‏ 2 Timothy 2

Христос Исуст итклтә бол

1 Көвүн минь, Христос Исусин өгчәх хәәрлт чамаг батратха! 2 Талдан әмт сурһх дүңгә итклтә улст олн герчнрин нүүрт нанас соңссн тоотан келҗ йов. 3 Чи Христос Исусин итклтә дәәч мет зовлң да ^{▼▼Оңданар болхла, Христос Исусин нанд даалһсн тоот.}. 4 Нег чигн дәәч өдгә бәәдлин керглә оралдҗахмн уга. Түүнә һол төрнь – эврәннь толһачд таасгдх төр. 5 Кемр марһана диг-дараг эвдхлә, нег чигн бөк эврәннь ачлвран авч чадшго. 6 Тәрәнд көдлҗәх көдлмшч күн эврәннь хүвән хамгин түрүнд авх зөвтә. 7 Мини келҗәхиг ухал. Чамд цугтаһинь медхд Деед Эзн дөң болх. 8 – 9 Давидин хөөт үй, үкәд әмдрсн Христос Исусиг оньдин санҗ йов. Энтн мини тархасн Сән Зәңгәс медгдҗәнә. Сән Зәңг тархаснас көлтә би зовҗ йовнав. Терүнәс көлтә намаг йос эвдсн күн кевтә цевлв. Болв Бурхна үгиг цевлҗ болшго. 10 Тиигәд би Бурхна шүүҗ авсн улсин төлә, тедн Христос Исуст иткәд аврлта болн мөңк җирһлтә болтха гиһәд цугинь дааҗанав.

11 Иигҗ келсн чик. Энүнд итктн: кемр бидн Христос Исусла хамдан үксн болхла, Терүнлә хамдан бидн җирһхвидн. 12 Кемр бидн ода тесҗәхлә, Терүнлә һардх цаг учрх. Кемр: Бидн Терүг медхшвидн гихлә, Тер бас мадниг медхшв гих. 13 Кемр бидн үгдән күрдго болхла, Тер оньдин үгдән күрнә. Яһад гихлә, Христос Исус бийиннь авц-бәрцән оңдарулҗ чадшго.

Христосин үнн зарц

14 Бурхар ^{▼▼Оңданар болхла, Деед Эзәр.} герч кеһәд, чи сүзгтә улсиг үг деерәс бичә зүтклдтхә гиҗ седвәр орулҗ закҗа. Иим зүтклдән олз төрүц орулшго, соңсҗах улсиг иткләс салһх. 15 Бурхн чамаг сән зарц гиҗ келдгәр сәәнәр көдл. Эврәннь кесн көдлмшәсн ичдгоһар Бурхна үгиг чикәр сурһ. 16 Бурхн уга күүндврәс хол йов. Тиим күүндвр әмтиг Бурхнас хольҗулад йовна. 17 Тиим күүндвр үклин хальдврта гем мет тарна. Хуменья Пилет хойр тиим күүндвр кеҗәнә. 18 Эдн үнн юмнас зөвәр хольҗад одцхав. «Бидн, иткдг улс, әмдрҗ одлавидн», – гиҗ тедн келҗәнә. Энүгәрн тедн олн улсин сүзг уурулҗана. 19 Болв Бурхна бат ул күүршго. Терүн деер иим бичвртә тамһ бәәнә: «Деед Эзн эврәксән меднә», дәкәд «Би Деед Эзнә күмб гиҗәх күн, эврәннь килнцтә керг-үүлән хайх зөвтә». 20 Ик гер болһнд, цаһан мөңгн, алтн савмудас талдан, модар болн шаврар кегдсн савмуд бәәхиг чи меднәлмч. Зәрм сав ачта кергт олзлгдна, зәрмнь йирин бәәдлд кергтә. 21 Кемр күн тер худл номас цеврдәд һархла, ачта кергин төлә бәрҗәх сав мет тер болх. Яһад гихлә, тер Бурхнд нерәдгдсмн, дәкәд эврәннь Эзнд керглгдҗәнә. Тиим күн сән йовдл күцәхдән кезә чигн белн. 22 Баһ насна җилвтә седкләс сагл. Чик седклтә бә. Деед Эзнд үнн ухаһарн мөргсн улсла итклтә бә, дурл, эвтәһәр бә. 23 Медрл уга болн һәргтә зүтклдәнд бичә орлц. Тиим юмн кезә чигн саллт цацхмн болҗана. 24 Деед Эзнә зарц тиим биш болх йоста. Тер, хәрнь, цаһан санатаһар цугталань бәәх, сурһмҗ дасхх, эврән тесвртә болх йоста. 25 – 26 Кемр түүнә кергт кен негнь харш болҗахла, терүг җөөлн кевәр чиклх кергтә. Тиигәд одҗ, Бурхн терүнд ухан-санаһан сольх арһ өгх йосн үнниг медхмн болвза. Тегәд тер күн эрлгин хавхас һарч чадх. Яһад гихлә, урднь эрлг терүг бәрҗ авад, эврәннь үлмәд орулсмн билә.