2Ti 1 | XalIBTNT | STEP | Павелас, Бурхна седвәрәр шүүҗ авсн Христос Исусин апостолас. Урднь амлсн җирһлиг цәәлһтхә гиҗ Бурхн намаг илгәв. Зуг бидн Христос Исусла нииләд иим җирһлиг эдлҗ чадхвидн.

‏ 2 Timothy 1

Мендллһн

1 Павелас, Бурхна седвәрәр шүүҗ авсн Христос Исусин апостолас. Урднь амлсн җирһлиг цәәлһтхә гиҗ Бурхн намаг илгәв. Зуг бидн Христос Исусла нииләд иим җирһлиг эдлҗ чадхвидн. 2 Мини эңкр көвүн Тимофейд. Эцк Бурхн болн мана Деед Эзн Христос Исус чамд цаһан сана, хәәрлт болн эвтә бәәдл өгтхә.

Бурхнд илгәҗәх ханлт

3 Цевр седкләрн Бурхнд шүтәд мини өвкнр кеснлә әдл, би чини төлә өдр сө уга Бурхнд зальврҗ ханлтан өргҗәнәв. 4 Чини уульсиг санад, чамаг дегд икәр үзхәр седҗәнәв. Эн харһлт намаг йир байрлулх билә. 5 Чини үннч итклин тускар би саннав. Чини эмг эк Лоис тиигҗ иткдг билә, чини эк Юникә чигн бас. Чамаг теднлә әдл сүзгтә бәәх гиҗ би йир ицҗәнәв. 6 Бурхна өгсн билгиг күццднь олзл гиҗ би чамд седвәр орулҗанав. Намаг һаран чам деер тәвсн цагт чи эн билг авлач. 7 Мадниг күчтә болад, әмтнд дурта болад, бийән бәрҗ бәәтхә гиҗ, бичә әәтхә гиҗ Әрүн Сәкүс Бурхн өглә. 8 Тиигҗ Деед Эзнә тускар келхләрн бичә ә. Христосас көлтә намаг бәрәнд бәәхәс бас бичә ич. Түүнә ормд Сән Зәңгин төлә нанла әдл зовлң даахдан белн бол. Бурхн чамд тер зовлңгиг даах күч өгх. 9 Бурхн мадниг аврад, Түүнә улс болтха гиҗ дуудв. Мана сән керг-үүлин төлә биш, зуг Эврәннь цаһан санаһарн болн Эврәннь зураһар Бурхн тиигв. Делкә үүдтл Бурхн Христосар дамҗад маднд цаһан санаһан өгв. 10 Мана Аврач Христос Исус эн һазрт ирсәр бидн Бурхна хәәрлт үзҗәнәвидн. Христос үклиг дииләд, маднд мөңк җирһлин хаалһ заасиг бидн Сән Зәңгәс меднәвидн. 11 Намаг, Сән Зәңг тархач апостол болн багш болтха гиҗ Бурхн шиидв. 12 Терүнәс көлтә би ода йир икәр зовҗанав. Болв кенд иткҗәхән сәәнәр меднәв, зовлңгас төрүц әәҗәхшв. Мини даалһсн тоотыг Исус Христос сүл өдр күртл хадһлх гиҗ икәр ицҗәнәв. 13 Нанас соңссн тоотан олзл. Тер чамд чик номин үлгүр болх. Христос Исусла ниилсн учрас Терүнд иткәд дурл. 14 Чамд бәәх Әрүн Сәкүснә күчәр чамд даалһсн үнниг хадһл.

Павелын зәңгс

15 Пүгел Гермоген хойр болн Азийин һазрт бәәх инкдг улс цугтан намаг үлдәв. Түүг чи меднәч. 16 Өнәсәпр болн энүнә өрк-бүлинь Деед Эзн хәәрлг. Нанд тер кесг дәкҗ дөңгән күрглә. Намаг түүрмд суулһснас тер мел ичдго билә. 17 Римд ирхләрн тер намаг хәәһәд олҗ авла. 18 Деед Эзн эврәннь ирх өдртән түүг хәәрлтхә. Епес балһснд нанд Өнәсәпр яһҗ урмд өгсинь чи сәәнәр меднәлмч.