Col 2 | XalIBTNT | STEP | Танд болн Ләәдикья балһснд бәәсн иткдг улст, нанла харһад уга улст дөң болхар би яһҗ ик зовлң дааҗ көдлҗ йовхин тускар медүлхәр седләв.

‏ Colossians 2

1 Танд болн Ләәдикья балһснд бәәсн иткдг улст, нанла харһад уга улст дөң болхар би яһҗ ик зовлң дааҗ көдлҗ йовхин тускар медүлхәр седләв. 2 Тедниг зөргтә болтха гиһәд, нег-негндән дуран тусхатха гиһәд би тиигҗ көдлв. Тиигәд үнн медрләс йосн нәәлвр кевтән ирх. Тедн тиигҗ Бурхна нууциг медҗ авх. Эн нууцнь – Христос Бийнь. 3 Христос Бурхна цецнинь болн медрлинь, бултулгдсн зөөр үзүлсн метәр медүлҗәнә. 4 Энүнә тускар бичхләрн, би кен чигн тадниг худл үгәрн, ямаран сән эс болв чигн чик хаалһас бичә хаҗилһтхә гиҗ санлав. 5 Би таднла хамдан эс бәәвв чигн, болв би кезә чигн таднла бәәнәв. Тадна диг-даратаһар зогсиг Христост лавта кевәр итксиг үзәд би байрлҗанав.

Христосла ниилсн йосн җирһл

6 – 7 Христос Исус Деед Эзн гиҗ итксндән тадн Терүнлә ни-негәр бәәтн. Модна уңг гүүнд урһснла әдл тадн эврәннь иткл батлтн. Бәрҗәх гер ул деер зогсснла әдләр тадн эврәннь җирһлдән Христост улм икәр нәәлтн. Энүг цугтаһинь таднд дасхла. Энүнә төлә ханлтан өргтн. 8 Тадниг эндүрлһнә үлмәд орулхас саглтн. Тиим йовдл олн әмтнә авъясас, орчлңгиг залҗах сәкүсдәс ^{▼▼Оңгданар болхла, «Тадниг эндүрлһнә үлмәд орулхас саглтн. Тиим йовдл олн әмтнә авъясас, орчлңгин туск эклц номас һарчах күүнә цецн уханас болн йирин худлас учрх».}, күүнәс һарчах цецн уханас болн йирин худлас учрх. Зуг Христосас биш. 9 Бурхн бийнь кевтән Христост, Терүнә цогц-махмудт бәәнә. 10 Тадн Христосла нииләд бәәсндән йосндан үнн җирһл аввт. Христос болх болшго, һардҗах болн йос бәрҗәх сәкүснәс өөдән йовна. 11 Христосла ни-негәр бәәһәд тадн керчүлгдләт. Тадниг күн биш Христос керчлә. Эн керчлһнә учрнь иим: му йовдл һарһх седвәрин үлмәһәс сулдхлһн. 12 Тадн уснд булхулгдхларн Исус Христосла оршагдад, Терүнлә тадн әмдрләт. Энтн Хритосиг әмдрүлсн Бурхна күчнд таниг иткснәс иштә учрв. 13 Урднь болхла тадн эврәннь килнцәсн көлтә болн эс керчүлгдсндән үкснә тоод йовлат. Болв Бурхн тадниг Христосла әмдрүлв. Бурхн мана цуг килнциг тәвҗ өгв. 14 Мадниг бурушаҗасн зааврмудта болн мана ялта цаасиг Тер уга кев. Терүг Бурхн кирст хадад кевтнь уга кев. 15 Христос һардҗах болн йос бәрҗәх сәкүснәс бийән сулдхв ^{▼▼Оңданар болхла, «Христос һардҗах болн йос бәрҗәх сәкүснәс йос булаҗ авв».}. Бәргдсн тедниг Христос ик диилвртәһәр олнд үзүлҗ йовулв. 16 Тиигәд тадниг ю идх, уух, бурхн-шаҗна нәәрт орх, эс орхиг, шин сар һарсиг болн бемб өдр темдглх, эс темдглхиг нег чигн күн бичә гемшәтхә. 17 Тертн зуг цугтан иргчдән учрх йоста бәәсн юмна сүүдр болҗана. Лавта бәәдлнь Христос мөн. 18 Онц үзгдл үзсн төләдән бийән ик санатад тоолҗах күн бичә таниг гемшәтхә. Тиим күн талдан улс худлахар номһрулад, Бурхна элчнрт шүттхә гиҗ заана. Тиим күүнә ухан йирин күүнә уханла әдл. Терүгәрн деерлкнә. Болв деерлкх учр төрүц уга. 19 Тиим күн цогцин толһа болҗах Христост нәәлдгән уурв. Христосас цогц кевтән эдлвр авна. Терүнә цогцнь үйәр шүрүсәр бәрәтә болад, Бурхна таалар өсҗәнә.

Христосла хамдан үклһн болн җирһлһн

20 – 21 Тадн Христосла хамдан үкләт, тиигәд орчлң залҗах сәкүсдәс ^{▼▼Оңгданар болхла, «Тадн Христосла хамдан үкләт тиигәд орчлңгин туск эклц номас сулдхгдвт».} сулдхгдвт. Тиигхлә яһад тадн эн нарт делкән улсла әдләр бийән бәрнәт? Тиигәд: «энүг бичә бәр», «терүг бичә эдл», «энүг бичә көндә», иим зокъялмудар яһад һардвр кенәт? 22 Энтн зуг идх уухин туск зокъял. Эн зокъялмудыг күцәснәс төрүц олз уга. Иим зокъялмуд күүнә үүдәсн зокъялмуд болн ном. 23 Иим зокъялмуд күүнә цецн уханас үүдсн болҗ медгдҗәнә. Тедн медәнәр эврән Бурхна элчнрт шүтҗәхин, худлар номһрҗахин, цогцан модьрунар зоваҗахин тускар келҗәнә. Болв тиим зокъялмуд эврәннь седвәрән һардхар седсн күүнд тусан күргшго ^{▼▼Оңданар болхла, «Болв тиим зокъялмуд тусан күргхш. Энтн цогц-махмудын таал болҗана».}.