Colossians 4
1Тадн, эздүд, эврәннь зарцнран чикәр болн зөвтәһәр бәртн. Тана Деед Эзн теңгрт бәәхиг мартхмн биш.Селвгүд
2Таслт угаһар зальврад, серглңгәр бәәһәд, оньдин йөрәлән өргҗәтн. 3Цаарандан Христосин нуувчин туск Эврәннь үгиг тархах арһ Бурхн маднд өгтхә гиһәд мана төлә бас зальвртн. Энүнәс көлтә би ода түүрмд бәәнәв. 4Намаг тодрхаһар цәәлһтхә гиһәд тадн зальвртн. Эн көдлмшиг би кех йостав. 5Христост иткдго улсла харһхларн, цецнәр бийән бәртн. Христосин тускар ямаран чигн арһан олзлад күүндтн. 6Күүнлә күүндхлә, тана келсн үг соньн болн таалмҗта болх йоста. Тиигчкәд әмтнд яһҗ чикәр хәрү өгхиг тадн медх зөвтәт.Сүл мендллһн
7Мини тускар таднд мана эңкр дү, итклтә нөкд, маднла әдл Деед Эзнд церглҗәх Түхк цугинь келҗ өгх. 8Мадниг ямаран бәәдлд бәәхиг медүлхин төлә, таднд урмд өгхин төлә би терүг тадн тал илгәҗәнәв. 9Тадн тал тана хотнас ирсн итклтә болн эңкр дү Өнәсмиг Түхктә би бас илгәҗәнәв. Тедн энд юн болҗахинь цугтаһинь таднд келҗ өгх. 10Нанла хамдан бәрәнд бәәх Аристарх менд келүлҗәнә. Бар-Набан зе көвүн Марк бас таднд мендән илгәҗәнә. Би таднд терүнә тускар бичләв. Кемр тер тана тал ирхлә, терүг тосҗ автн. 11Юст гиҗ цугтан келдг Исус таднд мендән келүлҗәнә. Зуг эн һурвн Христост иткдг евреймүд Бурхна нутгин төлә нанла хамдан көдлҗәнә. Эдн нанд йир икәр дөңгән күргв. 12Тана багин гешүн болн Христос Исусин зарц Эпапр бас менд келүлҗәнә. Эн оньдин тана төлә зальврна. Бурхнас иигҗ сурна: «Алмацл уга, Бурхиг соңсҗ зүркәрн иткдг улсла әдл, тедниг кевтә бат итклтә кетн». 13Тана төлә, Ләәдикьян болн Ераполин иткдг улсин төлә тер йир шунҗ көдлҗәхиг би герчлҗ чадхв. 14Таднд мана күндтә эмч Лука болн Дэм мендән илгәҗәнә. 15Ләәдикьяд бәәх ахнр-дүүнрт болн Нумпад, терүнә герт цуглрдг хурлд нанас менд келтн. 16Эн бичг танад умшгдсна дару Ләәдикьян чонҗд умшулхин төлә илгәчктн. Тадн болхла Ләәдикьяс илгәгдх мини бичг умштн. 17Деед Эзнд церглн бәәҗ Архипд даалһсн даалһвриг күцәтхә гиһәд келчктн. 18Эн бичгиг эврәннь һарарн бичҗәнәв: Павел таднд мендән илгәҗәнә. Намаг бәрәнд бәәхиг бичә марттн. Тадниг цугтаһитн Бурхн хәәрлтхә!
Copyright information for
XalIBTNT