Eph 2 | XalIBTNT | STEP | Тадн зака эвдснәс иштә болн килнцәсн көлтә үкҗ одлат.

‏ Ephesians 2

Шин җирһл

1 Тадн зака эвдснәс иштә болн килнцәсн көлтә үкҗ одлат. 2 Тиигхд тадн эн делкәд бәәх әмтнлә әдл килнцтә җирһләр бәәләт. Тадн му һардачин үлмәд бәәләт. Тер теңгртк хар сәкүсдиг һардҗана, Бурхна соңсхвр уга улсин седкл эзлҗәнә. 3 Цагтан бидн цугтан бас теднлә әдл биләвидн. Цогц-махмудыннь болн ухананнь седвәрәр бәәләвидн. Наадк улсла әдл бәәснд мадниг Бурхн засглх бәәсмн. 4 – 5 Болв хәәрлтәр байн, маднд дегд дурта Бурхн зака эвдснәс көлтә үксн мадниг Христосла хамдан әмдрүлв. Тадн Бурхна хәәрлтәр авргдвт. 6 Терүнлә хамдан теңгрин орн-нутгт залхин төлә Бурхн мадниг Христос Исусла әмдрүлв. 7 Тиигҗ кехләрн, Бурхн эврәннь кемҗән уга хәәрлтән мөңкинд үзүлв. Эн хәәрлтән Бурхн маднд Христос Исусин дурар күргв. 8 Яһад гихлә, тадн хәәрлтин ашт иткләр дамҗад авргдвт. Тадн хәәрлтд күршго биләт. Болв Бурхн терүг таднд белглв. 9 Тадн эврәннь кергәр авргдсн угат. Кен чигн күн бичә көөртхә! 10 Бидн Бурхна үүдәсн улсвидн. Терүнә белдсн цаһан саната керг мадниг күцәтхә гиһәд Бурхн мадниг Исус Христосла нииләд үүдәв.

Христос улсиг цугтаһинь негдүлв

11 Төрхәрә тадн керчүлгдсн улсин келсәр, керчүлгдәд уга буру номта улс болҗахан бичә марттн. 12 Тиигхд тадн Христос угаһар бәәсән бас бичә марттн. Тадн Бурхна шүүҗ авсн улс биш биләт, тадн Бурхна өгх болсн бооцанд орлцшго биләт. Ицл уга болн Бурхн уга бәәләт тадн. 13 Болв ода Христосла ниилснә күчәр урднь холд бәәсн улс тадн өөрхн болвт. Юңгад гихлә, Христос тадна төлә цусан асхв. 14 Христос маднд эвин хәрлцә авч ирв. Евреймүдиг болн буру номта улсиг нег улст негдүлв. Христос кирс деер үкхләрн таднд дәәсн болҗасн эрсинь нурав. 15 Хойр оңдан улсиг Бийтәһән ниилүләд нег шин улс Тер үүдәһәд, тедниг хоорнднь эвцүлхин төлә закврта болн зокалта зака уурулв. 16 Христос кирс деер болсн үкләрн теднә хоорндк дәәсиг дарв. Кирсәр хойр улсиг негдүләд, тедниг Бурхнд хәрү өгв. 17 Тиигәд Христос ирәд, таднд эвин туск Сән Зәңгиг Бурхнас хол йовсн буру номта улст, Бурхнд өөрхн бәәсн евреймүдт тархав. 18 Христосин кесн көдлмшин ашар бидн цугтан нег Әрүн Сәкүсәр дамҗад Эцк талан ирҗ чадҗанавидн.

19 Ода тадн тиигәд күүнә, йовцсн улс бишит. Тадн Бурхна улсла нег улс болад, Терүнә өрк-бүлин улс болҗанат. 20 Тадн тосхгдсн гер мет апостолмудын болн әәлдәчнрин номин ул деер тосхгдвт. Тадна тосхлтын хамгин һол чолунь Христос Исус болҗана. 21 Һол чолун деер гер кевтән зогсҗана. Деед Эзнд нерәдсн әрүн сүм болтл Терүг өөдән өскҗәнә. 22 Христосла нииләд, гер мет тадн цугталань хамдан тосхгдҗанат. Тер герт Бурхн Әрүн Сәкүсәр дамҗад бәәнә.